مەسرور بارزانی، سەرۆكی حكومەتی هەرێمی كوردستان، ڕەزامەندیی دا لەسەر خەرجكردنی زیاتر لە ٧ ملیار دینار بۆ پاڵپشتیكردنی خوێندكارانی زانكۆ و پەیمانگاكان.
حكومەتی هەرێمی كوردستان لە ڕاگەیەنراوێكدا ئاماژەی بەوەكردووە، لە چوارچێوەی گرنگیدانی كابینەی نۆیەمی حكومەتی هەرێم بە كەرتی خوێندن و پاڵپشتی بۆ خوێندكارانی زانكۆ و پەیمانگاكانی هەرێمی كوردستان، مەسرور بارزانی، سەرۆكی حكومەتی هەرێمی كوردستان، ڕەزامەندیی دا لەسەر بەردەوامبوونی خەرجكردنی بڕی ٧ ملیار و ٢٥٠ ملیۆن دیناری مانگانە بۆ خوێندكاران.
ڕاشیگەیاندووە، بەشێكی ئەو پارەیە بۆ دابینكردنی خزمەتگوزاری لە بەشە ناوخۆییەكان بۆ ساڵی خوێندنی (٢٠٢٣-٢٠٢٤) هاوشێوەی ساڵی خوێندنی (٢٠٢٢-٢٠٢٣) لەسەر بودجەی زانكۆ و پەیمانگاكان خەرج دەكرێت.
بەپێی ڕێنمایی دارایی، هەر خوێندكارێكی زانكۆ و پەیمانگاكان لەناو شارەكان بڕی 40 هەزار دینار و لە دەرەوەی شار بڕی 60 هەزار دیناری پێ دەدرێت.
