بە هۆکارێکی نادیار ئاگرێکی فراوان لە سنوری قەزای قەرەداغی سەر بە پارێزگای سلێمانی کەوتەوە و سەدان دۆنم سووتا.
ئەمڕۆ یەکشەممە، پۆلیسی پاراستنی دارستان و ژینگەی سلێمانی ڕایگەیاند، بە هۆکارێکی نادیار ئاگرێکی فراوان لە سنوری چیای گوندی تەکێی سەر بە ناحیەی سێوسێنان کەوتەوە.
ڕوونیشیکردەوە، دەستبەجێ مەفرەزەکانی بەشی پۆلیسی دارستانی قەرەداغ و بنکەی سێوسێنان گەیشتنە شوێنی ڕووداوەکە، سەرەتا توانرا بە ماوەی کەمتر لە سێ کاتژمێر ئاگرەکە کۆنتڕۆڵ بکرێت، بەڵام بە هۆی سەختی و لێژی شوێنەوەکە دووبارە ئەگرەکە سەریهەڵدایەوە، لەئەنجامدا جارێکی دیکە تەواوی ئاگرەکە کۆنتڕۆڵکرایەوە.
لە ڕاگەیەندراوەکەدا هاتووە کە بە هۆی ئاگرەکەوە نزیکەی ٥٠٠ دۆنم لە پوش و پاوان و داری سروشتی و باخی هاووڵاتییان سووتا.
پۆلیسی دارستانی سلێمانی ئەوەشی خستەڕوو کە لێکۆڵینەوە و بەدواداچوون بۆ دۆزینەوەی هۆکاری ئاگرەکە یاخود کەسی تۆمەتبار بەردەوامە.
