بەپێی ڕاگەیەنراوەکە، داھاتی عێراق لە فرۆشتنی نەوت بۆ مانگی ئایار، گەیشتووەتە ٧ ملیار و ٣٠٦ ملیۆن دۆلار، لە کاتێکدا لە مانگی نیساندا، ٧ ملیار و ٧٩٩ ملیۆن دۆلار بووە و داھات بۆ مانگی ئایار بەراورد بە مانگی نیسان، ٤٩٣ ملیۆن دۆلار کەمی کردووە.
لە راگەیەندراوەکەدا ئاماژە بەوە دراوە، بڕی ئەو نەوتەی کە لە مانگی رابردوودا ھەناردەکراوە، ١٠٢ ملیۆن و ٤٦٣ ھەزار و ٣٨٧ بەرمیل بووە کە کۆی گشتی داھاتەکەی گەیشتووەتە، حەوت ملیار و ٣٠٦ ملیۆن دۆلار.
باس لەوەشکراوە، لە مانگی ئایاردا، بڕی نەوتی ھەناردەکراو لە کێڵگە نەوتییەکانی ناوەڕاست و باشووری عێراق، ١٠٢ ملیۆن و ٢٠٦ ھەزار و ٤١٣ بەرمیل بووە.
ئەوەش خراوەتەڕوو کە لە مانگی رابردوودا، رۆژانە تێکڕا سێ ملیۆن و ٣٠٥ ھەزار بەرمیل نەوت ھەناردەکراوە.
لە راگەیەندراوەکەدا، ھەروەھا ئاماژە بەوە دراوە کە لە مانگی ئایاردا، یەک بەرمیل نەوت تێکڕا بە ٧١ دۆلار و ٣٠ سەنت فرۆشراوە.
داھاتی عێراق لە فرۆشتنی نەوت لە مانگی نیساندا، حەوت ملیار و ٧٩٩ ملیۆن دۆلار بووە،بەمەش داھاتی عێراق لە فرۆشتنی نەوت لە مانگی ئایاردا، بەراورد بە مانگی نیسان، ٤٩٣ ملیۆن دۆلار کەمیکردووە.
