ئەمڕۆ یەکشەممە، ٤ – ٦ – ٢٠٢٣، عەبدوللەتیف جەمال ڕەشید سەرۆککۆماری عێراق، لە میانی دیدارێکدا لەگەڵ قاسم ئەعرەجی، ڕاوێژکاری ئاسایشی نیشتمانی، پێداچوونەوەیان بە دۆخی سیاسی و ئەمنی عێراقدا کرد.
نووسینگەی ڕاگەیاندنی سەرۆککۆمار، ڕایگەیاندووە، “لە کۆشکی بەغدا، پیشوازیان لە ڕاوێژکاری ئاسایشی نیشتمانی، قاسم ئەعرەجی کردووە و لە میانی دیدارێکدا پێداچوونەوە بە دۆخی سیاسی و ئەمنی وڵاتدا کراوە، و جەختکرایەوە لە دڵنیابوون لە سەلامەتی هاووڵاتیان و پاراستنی مافەکانیان، و گرنگی چڕکردنەوەی کاری هێزە ئەمنی و هەواڵگرییەکان لە کۆنترۆڵکردن و ئاسایشی سنوورەکاندا.
هەر لە دیدارەکەدا ئاماژە بە گەڕانەوەی ئاوارەکان بۆ ناوچەکانی نیشتەجێبوونیان و باشترکردنی دۆخی خزمەتگوزارییەکان و پاراستن و بەردەوامی ئەو دەستکەوتە ئەمنییانەی بەدەست هاتوون کرا، بە شێوەیەک کە متمانەی هاووڵاتیان بە دەوڵەت بەرز بکاتەوە.
