ئەمڕۆ پێنج شەممە، لە ئەنجامی فڕێدانی دوو بۆمب و تەقەکردن لە ئاهەنگێکی بووکێنی لە شارۆچکەی مشریفە لە حومس، دوو کەس گیانیان لەدەستدا و دەیان کەسیش برینداربوون، هەندێکیان برینەكەیان سەختە.
وەزارەتی ناوخۆی سوریا، لە بەیاننامەیەکدا لە تۆڕی کۆمەڵایەتی فەیسبووک بڵاویکردەوە: “پۆلیسی ناحیەی عەین ئەلنەسر لە پارێزگای حومس پێی ڕاگەیاندوون، کە دوو کەس دوو بۆمبیان فڕێداوە و تەقەیان لە ئاهەنگێکی هاوسەرگیری لە شارۆچکەی ئەلمشریفە كردووە، بەهۆیەوە چەند كەسێك بریندار بوون”.
ئاماژەی بەوەشکردووە، “هێزەكانی پۆلیس چوونەتە شوێنەکە، لەوێ دەرکەوتووە 2 کەس گیانیان لەدەستداوە و 47 کەسی دیکەش برینداربوون، هەندێکیان باری تەندروستییان سەختە”.
ڕاشیگەیاندووە، “چارەسەری بریندارەکان کراوە و کوژراوەکەش گواستراوەتەوە بۆ نەخۆشخانەکانی حومس”.
وەزارەتی ناوخۆی سوریا ئاشكراشی كردووە، “لە لێکۆڵینەوە سەرەتاییەکاندا دەرکەوتووە، دوو کەس (فادی و حازم) خەڵکی گوندی ئوقەیربات دوو بۆمبیان فڕێداوە و تەقەیان لە ئاهەنگی هاوسەرگیرییەکە کردووە، بەهۆی ناکۆکی کەسییەوە، دواتر هەڵاتوون”.
