فەرمانگەی میدیا و زانیاری ڕایگەیاندووە، سەرۆکایەتی دیوان بە زیادکردنی ئاشکرا سێ ئۆتۆمبێل دەفرۆشێت.
لە ئاگادارییەکدا فەرمانگەى کاروبارى کارگێڕی و دارایی سەر بە سەرۆکایەتیی دیوان لە ئەنجوومەنی وەزیران بە زیادکردنی ئاشکرا، سێ ئۆتۆمبێلی لە جۆری تۆیۆتا لاندکرۆزەری زرێپۆش دەفرۆشیت.
هەر کەس خوازیارە دەتوانێت بەشداری زیادکردنی ئاشکرا بکات و سەردانی بەشی فرۆشتن و ئامێرەکانی سەرۆکایەتی ئەنجومەنی وەزیران بکات، زیادکردنەکە ١٢ی حوزەیران کاتژمێر ١٢ی نیوەڕۆ بەڕێوەدەچێت.
ئەو کەسەی خوازیارە دەبێت ئەم خاڵانە جێبەجێبکات:
یەکەم، دانانى بارمتەى یاسایی بە شێوەى چەکی پەسندکراو بە بڕی ٢٧ ملیۆن دینار.
دووەم، ڕسومات و خەرجییەکانی بڵاوکردنەوەى ئەم ئاگادارییە دەکەوێتە ئەستۆى ئەو بەشدارەى زیادکردنەکە دەباتەوە.
سێیەم، فرۆشتنی ئۆتۆمبێلەکان بە شێوەى نەختینە (نەقد) دەبێت و دینارى عێراقی وەردەگیرێت.
چوارەم، کڕیار پێویستە لە ماوەی هەفتەیەک ئۆتۆمبێلەکان بگوازێتەوە.
پێنجەم، دەبێت بەشداربوو مۆڵەتی ڕێگەپێدانی بەکارهێنانی ئەم جۆرە ئۆتۆمبێلانەى لەلایەن وەزارەتی ناوخۆ هەبێت.
