بەپێی ڕاپۆرتە كەشناسییەكان، تا كۆتایی ئەم مانگە دۆخی كەشوهەوا ناسەقامگیر دەبێت و باران و هەورەتریشقە چەند ناوچەیەك دەگرێتەوە.
سبەینێ هەینی، كە پشووە و زۆرێك لە هاووڵاتیان بۆ گەشت و سەیران دەچنە ناوچە گەشتیاری و شاخاوییەكان، بەڵام شارەزایەكی كەشناسی دەڵێت: “لە سنووری سلێمانی و هەڵەبجە و ڕاپەڕین و سۆران ئەگەری تاوە باران و هەورە تریشقە هەیە.
ئاراس جەبار، شارەزای كەشناسی بۆ (خەڵك) ڕایگەیاند، سبەینێ هەینی 26ی ئایار، ئاسمانی ھەرێم بە زۆری ساماڵ و پەڵە ھەور ئەبێت لەکاتەکانی پاش نیوەڕۆدا ئەگەری دروستبوونی کەڵەکە ھەوری ناوخۆیی ئەبێت بەشێوەی تاوە بارانی کورت و ھەورە تریشقە لەھەندێ لە ناوچەکانی سنوری پارێزگای ھەڵەبجە و سلێمانی و ئیدارەی ڕاپەرین و سۆران.
ڕاشیگەیاند، پلەکانی گەرما زیاتر بەجێگیری ئەمێننەوە و لەھەندێ ناوچەدا بەراورد بە ئەمڕۆ بەڕێژەی ١ پلە بەرزدەبنەوە و خێرای با مامناوەند ئەبێت ١٠-٢٥کم/ كاتژمێر لە ئاڕاستەی باشووری ڕۆژئاواوە .
ئەمە لەكاتێكدایە، كە بەپێی پێشبینییە كەشناسییەكان تا كۆتایی ئەم مانگە دۆخی كەشوهەوا ناسەقامگیر دەببێت و شەپۆلێكی دیكەی باران و هەورەتریشقە ناوچەكانی هەرێم دەگرێتەوە.
