له‌سه‌ر سكاڵای هاووڵاتییان و به‌هۆی به‌كرێدانی شه‌قامی به‌رده‌م پاركه‌كانی ئۆتۆمبێل، لیژنه هاوبه‌شه‌كانی قائیمقامیەتی سلێمانی خاوه‌نی ئه‌و شوێنانه ڕووبه‌ڕووی ڕێكاری یاسایی ده‌كاته‌وه.
رائیدی هاتوچۆ دانا عوسمان، سه‌رۆكی لیژنه‌ی هاتووچۆی قائیمقامیه‌تی سلێمانی ڕایگه‌یاند، شه‌قام و شۆسته‌ی به‌رده‌م پاركه‌كانی ئۆتۆمبێل موڵكی گشتین و بۆ ڕاگرتنی ئۆتۆمبێل و به‌كرێدان نیه، له‌سه‌ر سكاڵای هاووڵاتییان و به‌هۆی به‌كرێدانی شه‌قامه‌كان له‌لایه‌ن خاوه‌ن پاركه‌ركانی ئۆتۆمبێل به‌تایبه‌ت ناوبازاڕ، لیژنه‌كه ڕێكاری یاسایی به‌رامبه‌ر چه‌ند شوێنێك گرتۆ‌ته‌به‌ر و سزای یاساییان به‌سه‌ردا ده‌سه‌پێنێت.
وتیشی، “به‌پێی یاسا، شه‌قامه‌كان موڵكی گشتین و به‌كارهێنان بۆ هاووڵاتیانه و هه‌ركه‌سێكیش بیه‌وێت بۆ به‌رژه‌وه‌ندی تایبه‌تی خۆی به‌كاریبهێنێت و كرێی وه‌ستانی ئۆتۆمبێل له‌و شوێنانه له هاووڵاتی وه‌ربگرێت، له‌لایه‌ن لیژنه هاوبه‌شه‌كانی قائیمقامیه‌تی سلێمانیه‌وه ڕەوبه‌ڕوەی ڕێكاره یاساییه‌كان ده‌كرێته‌وه”.
ئاماژه‌ی بۆئه‌وهش‌كرد، پارككردنی ئوتومبێل له‌شه‌قامه‌كان و گه‌ڕه‌كه‌كان به‌تایبه‌تی ناوبازاڕ قه‌ده‌غه‌یه، چونكه ده‌بێته هۆی دروستبونی قه‌ره‌باڵغی و ئاسته‌نگی هاتووچۆ بۆ هاووڵاتیان، باشتر وایه له‌ناو پاركه‌كانی ئوتومبێل ڕابگیرێت، بۆ ئه‌وه‌ی له‌لایه‌ن به‌ڕێوه‌به‌رایه‌تی هاتوچۆوه ڕووبه‌ڕووی سزا و غرامه‌كردن نه‌بنه‌وه.
ڕاشیگه‌یاند؛ هه‌ر خاوه‌ن گه‌راجێك ئۆتۆمبێلی هاووڵاتیان له‌سه‌ر شه‌قام یان شۆسته‌ی نزیك گه‌راجه‌كه‌ی ڕابگرێت و كرێی لێوه‌ربگرێت، شۆفێره‌كه ده‌توانێت سكاڵای له‌سه‌ر بكات و لیژنه هاوبه‌شه‌كان ئاگاداربكاته‌وه، لەکاتی هەبونی گومان یان بۆ گەیاندنی سکاڵا و زانیاری بەقائیمقامیەتی سلێمانی و لیژنە هاوبەشەکان، پەیوەندی بە ژمارە مۆبایلی (07708677777)ـەوە بکەن.
