ئەمڕۆ شەممە پڕۆسەی دەنگدان بۆ خولی دووەمی هەڵبژاردنی سەرۆکایەتی تورکیا لە عێراق و هەرێمی کوردستان دەستی پێکرد.
دوای کێبڕکێیەکی توند و یەکلایی نەبوونەوەی سەرکەوتنی کاندیدی سەرۆکایەتی، لە دەرەوەی تورکیا خولی دووهەمی هەڵبژاردنی سەرۆکایەتی بەڕێوە دەچێت
پیشتر سەرۆکی کۆمسیۆنی هەڵبژاردنەکانی تورکیا، ئەحمەد یانار، لەگەڵ ڕاگەیاندنی ئەنجامی کۆتایی خولی یەکەمی هەڵبژاردنی سەرۆکایەتی تورکیا ، دوای ژماردنەوەی سەرجەم دەنگەکان، وتی؛ وڵاتەکەی وادەیەکی نوێی دەبێت بۆ هەڵبژاردنی دووەم.
لەگەری یەکەمی هەڵبژاردنەکاندا، هەریەکە لە ڕەجەب تەیب ئەردۆغان، سەرۆک کۆماری تورکیا ٪٤٩.٤ و کەمال کلیچدارئۆغڵو ٪٤٥.٠ دەنگەکانیان بەدەستهێنا.
ژمارەی دانیشتووانی تورکیا کە ٨٥ ملیۆن کەسە، ٦٤ ملیۆن کەس مافی بەشداری لە دەنگدانیان لەم هەڵبژاردنەدا هەبوو.
رۆژی ١٤ی ئایار، ھەڵبژاردنی سەرۆکایەتی و پەرلەمانی تورکیا بەڕێوەچوو کە تیاییدا ٢٥ پارت و ١٥١ پاڵێوراوی سەربەخۆ بەشداربوون و پارتەکان بەسەر پێنج ھاوپەیمانییدا دابەشببوون و دوای راگەیاندنی ئەنجامەکانیش بەھۆی بەدەست نەھێنانی رێژەی تەواو، ھەڵبژاردنی سەرۆکایەتی تورکیا کەوتە خولی دووەم و ئەمڕۆش لە دەرەوەی تورکیا پڕۆسەی دەنگدانەکە دەستی پێکرد.
بڕیارە خولی دووهەمی هەڵبژاردنی سەرۆکایەتییش لەناوخۆی تورکیا لە ٢٨ی ئایار بەڕێوە بچێت.
