گەورەترین وێستگەی بەرهەمهێنانی کارەبا بە وزەی خۆر لە عێراق و هەریمی کوردستان دروستدەکرێت، توانای بەرهەمهێنانی ٢٥ مێگاوات کارەبای دەبێت.
وەزارەتی کارەبای هەرێمی کوردستان ڕایگەیاند، ئەمڕۆ بەردی بناغەی وێستگەیەکی بەرهەمهێنانی کارەبا لە وزەی خۆر دانراوە، کە دەبێتە گەورەترین وێستگە لە هەرێمی کوردستان و عێراق.
ئاماژەی بۆ ئەوەشکردووە، وێستەگەکە دەکەوێتە گوندی منارەی دەروروبەری هەولێر و ڕووبەرەکەی ٥٩٠ دۆنمە، گوژمەی پڕۆژەکە ١٠٠ ملیۆن دۆلارە و ماوەی کارکردن لە پڕۆژەکە ساڵێکە.
بە تەواوبوونی وێستگەکە توانای بەرهەمهێنانی ٢٥ مێگاوات کارەبای دەبێت و دەبەسترێتەوە بە کارەبای نیشتیمانیەوە، ئەمەش لە کاتێکدایە لە هەرێمی کوردستان دوو وێستگەی بەرهەمهێنانی کارەبا لە وزەی خۆر هەیە، توانای بەرهەمهێنانیان سێ مێگاواتە.
وەزارەتی کارەبا ڕایگەیاندووە، ئێستا ٪٢٠ بۆ ٣٠ کارەبای هەرێمی کوردستان لە وزەی خۆر بەرهەمدەهێنرێت، حکومەت دەیەوێت ئەو ڕێژەیە لە پێناو پاراستنی ژینگە بەرزتر بکاتەوە.
