لەئەنجامی ڕووداوێکی هاتووچۆ لەجۆری شێلان لە گردەگۆزینەی سەر بەقەزای کەلار کەسێک گیانی لەدەستداو سێ کەسی دیکەش برینداربوون
هاتووچۆی گەرمیان بڵاویکردووەتەوە، ئەمشەو (دووشەمە) لەگردەگۆزینەی سەر بە قەزای کەلار ماتۆڕسکیلێک کە دوو کەسی لەسەر بووە (لێخوڕ و سەرنشین) لە شێخ لەنگەرەوە بەئاراستەی کەلار هاتوە لە ئافرەتێک و منداڵێک دەدات، بەهۆیەوە منداڵەکە و ئافرەتەکە لەگەڵ سەرنشین و لێخوڕی ماتۆڕ سکیلەکە برینداربوون.
هاتووچۆی گەرمیان دەشڵێت:”دەستبەجێ بریندارەکان گەیەنرانە نەخۆشخانەی فریاکەوتنی شەهید هەژار لە کەلار، بەهۆی سەختی برینەکەیەوە یەکێک لە بریندارەکان کە ئافرەتە و لەدایکبووی (1963)ە، گیانی لەدەست دا، لێخوڕی ماتۆڕ سکیلەکە بەهۆی سەختی برینەکەیەوە ڕەوانەی نەخۆشخانەی سلێمانی کرا”.
لەئێستادا تیمی هاتووچۆی گەرمیان لێکۆڵینەوەی لە ڕووداوەکە دەست پێکردووە، بەمەبەستی زانینی چۆنیەتی و هۆکاری ڕووداوەکە.
