ئەنجوومەنی پارێزگای سلێمانی داوا لە وەزارەتی ناوخۆ دەكات بۆ “كەم كردنەوەی ڕووداوی هاتووچۆی نەخوازراو” ڕێگای پێویست بگرێتە بەر بۆ تۆماركردن و پێدانی تابلۆ بە ئۆتۆمبێل.
كەریم عەلی، ئەندامی ئەنجوومەنی پارێزگای سلێمانی بۆ (خەڵك) ڕایگەیاند، بەیاداشتێك لە ڕێگای سەرۆكایەتی ئەنجوومەنەوە داوامان كردووە وەزارەتی ناخۆ ڕێگاچارەی گونجاو و پێویست بگرێتەبەر بۆ تۆماركردن و پێدانی ژمارە و تابلۆ بە ماتۆڕسكیل.
ڕاشیگەیاند، ئەمە كارە لە پێناو كەمكردنەوەی ڕووداوی هاتوچۆی نەخوازراوە، كە ڕۆژانە گوێبیستی دەبین و چەندین گەنج بەوهۆیەوە دەبنە قوربانی ئەمە سەرەڕای زیانە مادییەكان.
لە ئێستادا ژمارەی ماتۆڕسكیل بەشێوەیەكی بێشومار لەسەر شەقامەكان زیادیان كردووە و بەشیی زۆری بەدەست گەنجانەوەیە و هەندێكی كاری “دیلیڤەری” پێ دەكرێت و زۆرینەی بێ تابلۆیە و بەبێ مەرجەكانی سەلامەتی لێدەخوڕدرێن، كە ئەمەش زۆرجار كارەساتی نەخوازراوی لێ دەكەوێتەوە.
