لە ماوەی دواییدا حاڵەتەكانی تووشبوون بە نەخۆشی هەوكردنی پەردەی مێشك لە هەردوو پارێزگەی سلێمانی و هەڵەبجە دەركەوتن، بۆ ئەو مەبەستەش هۆشداریی درا و پزیشك و شارەزایانی تەندروستی هەڵمەتێكی هۆشیاركردنەوە و ناساندنی ئەو نەخۆشیەیان دەست پێ كرد، وەزارەتی تەندروستی عێراق لەو بارەیەوە ڕەتیدەكاتەوە، هیچ حاڵەتێكی مردن بە نەخۆشییەكە تۆماركرابێت.
د. سەیف بەدر، وتەبێژی وەزارەتی تەندروستی عێراق ڕایگەیاند:”هەوكردنی پەردەی مێشك لە عێراق هەیە و لە هەموو ناوچەكان حاڵەتی جیاجیا تۆمار دەكرێت، بەڵام ئەوەی لە سلێمانی و دەوروبەری هەیە، زیادبوونی ژمارەی حاڵەتەكانی تووشبوونە بە نەخۆشییەكە، بۆیە ساڵح حەسناوی وەزیری تەندروستی بەپەلە فەرمانی ڕەوانەكردنی تیمێكی تەندروستی پسپۆڕ بۆ ناوچەكە دەركرد”.
بە وتەی سەیف بەدر:”تیمەكە سەردانی ناوچەكەی كرد و ئاگەداری حاڵەتەكان بوو، پشكنین كراو نموونە لە نەخۆشەكان وەرگیرا و ڕەوانەی تاقیگەی ناوەندیی تەندروستی گشتی لە بەغدا كران،ئەوەی گرنگە تا ئێستا هیچ حاڵەتێكی مردن نییە، هەموو حاڵەتە تۆماركراوەكان لەژێر كۆنترۆڵدان و ڕێوشوێنی پێویست گیراوەتەبەر، زۆرێك لە تووشبووانیش باش بوون و نەخۆشخانەیان پەڕاندووە”.
وتەبێژی وەزارەتی تەندروستی عێراق دەڵێت:”ئێمە چاوەڕوانی ئەنجامی پشكنینەكان دەكەین بۆ زانینی هۆكاری زیادبوونی نەخۆشییەكە، داواش لە هاووڵاتییان میدیاكان دەكەین بابەتەكە گەورە نەكەن، ئێستا وەزیری تەندروستی خۆی بەدواچوون بۆ بابەتەكە دەكات و وردەكاریی حاڵەتەكە و ئەنجانی پشكنینەكانیش بە شێوەیەكی فەرمی ڕادەگەیەنرێن”.
