ئەمڕۆ نرخی مریشك بۆ 2 هەزار و 800 دینار بۆ هەر كیلۆیەك دابەزی، لەكاتێكدا پێشتر ئەو نرخە 5 هەزار دیناری تێپەڕاندبوو.
ماوەیەك پێش ئێستا كە مانگی ڕەمەزان و جەژنی ڕەمەزان بوو، نرخی مریشك بەرز ببووەوە، ئەمڕۆ نرخەكەی دابەزی و پێشبینی دابەزینی زیاتریشی دەكرێت.
بەكر ئەمین، مریشك فرۆش لە سلێمانی، بە (خەڵك)ی ڕاگەیاند، ئەمڕۆ نرخی یەك كیلۆ مریشك 2 هەزار و 800 دینارە.
هاوكات سۆران عەبدولغەفور، بەڕێوەبەری چاودێری بازرگانی سلێمانی بە (خەڵك)ی ڕاگەیاند، كار بۆ دابەزینی زیاتری نرخی مریشك دەكەین بە جۆرێك نرخی یەك كیلۆ بۆ 2 هەزار دینار داببەزێت.
لە بارەی هۆكاری دابەزینی نرخی مریشكەوە سۆران عەبدولغەفور ئاماژەی بە ئەوە كرد، ئێستا ڕێژەیەكی زۆری مریشك هاوردەكراوە و خواستی هاووڵاتیانیش لەسەری كەمبووەتەوە، بۆیە نرخەكەی ڕووی لە دابەزینە.
