محەمەد سەیهوود ئەندامی دەوڵەتی یاسا ڕایگەیاند، ڕێككەوتن هەیە ناوەڕاستی مانگی داهاتوو بوودجە پەسەند بكرێت.
سەیهوود لە لێدوانێكدا بۆ ئاژانسەكانی عێراق ڕایگەیاند، لیژنەی دارایی لە پەرلەمانی عێراق ئەمڕۆ میوانداری وەزیری دارایی و وەزیرە پەیوەندیدارەكانی دیكە دەكات بۆ گوێگرتن لە داواكارییەكانیان و بەراوردكارییەكان لە بوودجەدا كە خوێندنەوەی دووهەمی بۆ كراوە.
ڕوونیشیكردەوە، ئەمڕۆ میواندارییەكە دەستپێدەكات و لە سێ ڕۆژ زۆرتر ناخایەنێت، ئەوەش بۆ خێراكردنی پرۆسەكە تا گەیشتن بە دەنگدان لەسەری لەپەرلەمان.
هاوكات باسم ئەنتوان شارەزای ئابوووری ڕایگەیاند، پەسەندكردنی بوودجە دەبێتەهۆی دابەزینی زیاتری بەهای دۆلار و جێگیركردنی بەهای دینار و بەرزبوونەوەی.
دەشڵێت: ڕێوشوێنەكانی بانكی ناوەندی و حكومەتی عێراق ئاسانكاری زۆریان كرد بۆ ڕاگیرانی بەرزبوونەوەی بەهای دۆلار بە دابینكردنی دۆلاری پێویست بۆ بازاڕ لە ڕێگای سەكۆی ئەلیكترۆنی و پابەندكردنی بانك و كۆمپانیاكانی دراو بە ڕێنماییەكانەوە.
ئاماژەی بەوەشكرد، گرووپێك بەرزبوونەوەی دۆلاریان قۆستبووەوە بە بڵاوكردنەوەی دەنگۆی بەرزبوونەوەی نرخی 100 دۆلار بۆ 200 هەزار دینار.
