مەولود چاوش ئۆغڵو وەزیری دەرەوەی توركیا ڕەتیدەكاتەوە هێزەكانی وڵاتەكەی لە لە هەرێمی كوردستان و ڕۆژئاڤا پاشەكشەبكات.
چاوش ئۆغڵۆ ڕایگەیاند:”كشانەوەی ئێمە لە باكووری عێراق و باكووری سوریا بە واتای ڕاگرتنی ئۆپەراسیۆنە سەربازییەكانمانە دژ بە تیرۆر و نزیكبوونەوەی تیرۆریستانە لە سنوورەكانمان، ئەمەش مەترسی لەسەر ئاسایشی نەتەوەییمان دروست دەكات، ڕێكخراوە تیرۆریستییەكان ئەو بۆشاییە پڕدەكەنەوە، ئەگەر هێزەكانی توركیا لە باكووری سوریا بكشێنەوە، ئاسایشی نەتەوەیی و ئاسایشی سنوورەكان بۆ ئەنقەرە زۆر گرنگە”.
بە وتەی چاوش ئۆغڵو”ئێمە نامانەوێت بەشێك لە خاكی سوریا بۆخۆمان داببڕین، لەگەڵ ئەمەشدا ناتوانین لە باكووری سوریا بكشێینەوە، تا ئاسایش و ئارامی بۆ ناوچەكە دەگەڕێتەوە”.
لە وەڵامی پرسیارێكدا سەبارەت بە ئەگەری كۆبوونەوەی نێوان ڕەجەب تەیب ئەردۆغان سەرۆك كۆماری توركیا و بەشار ئەسەد سەرۆكی سوریا، چاوش ئۆغڵۆ وتی:”بەڵێ ئەگەری كۆبوونەوە هەیە، بەڵام دەبێت نەخشەڕێگایەك بۆ ئەم كۆبوونەوەیە لەسەرەتاوە ئامادە بكرێت كە بریتییە لە سەپاندنی مەرجی پێشوەختە، لێكۆڵینەوە لە قۆناغی سیاسی، بەرەنگاربوونەوەی تیرۆر و چەسپاندنی سەقامگیری لە سوریا”.
بە وتەی وەزیری دەرەوەی توركیا:”پەیوەندی لەگەڵ دەسەڵاتدارانی سوریا بەسوودە، ئەگەر بمانەوێت ئاوارەكانی سوریا بگەڕێنینەوە، ئەگەر بمانەوێت بەشێوەیەكی كاریگەرتر بەردەوام بین لە بەرەنگاربوونەوەی تیرۆر و ئەگەر بمانەوێت یەكپارچەیی خاكی سوریا بپارێزین،لەگەڵ هەموو ئەمانەدا ئەگەر ئاسایش و سەقامگیری لە سوریا جێگیر نەكرێت ، كاریگەری نەرێنی بۆسەر توركیا دەبێت”.
مەولود چاوش ئۆغڵۆ دەڵێت:”توركیا متمانەی بە ئەمریكا و فەرەنسا نییە سەبارەت بە بەرەنگاربوونەوەی تیرۆر، چونكە تائێشتاش واشنتن بەردەوامە لە پشتیوانیكردنی تیرۆریستانی BKKوYBG”.
ئەم قسانەی وەزیری دەرەوەی توركیا لە سەروبەندی كۆبوونەوەی وەزیرانی بەرگری و بەرپرسانی هەواڵگری سوریا، ڕووسیا، توركیا و ئێران بوو لە مۆسكۆ.
