شووتی بە یەكێك لە باشترین میوەكانی وەرزی هاوین دادەنرێت بۆ بەرەنگاربوونەوەی گەرما و ڕێگریكردن له وشكبوونەوەی جەستە و بە بژاردەیەكی باش دادەنرێت بۆ كاتی ڕێجیم و خۆپاراستن لە قەڵەوی.
🔴 گرنگترین سوودە تەندروستییەكانی شووتی
١- بەهێزكردنی بەرگری لەش : چونكە دەوڵەمەندە بە ماددە دژە ئۆكسانەكانی وەك لایكۆپین و كارۆتین و ڤیتامین سی بۆیە ڕۆڵێكی گرنگ دەبینێت لە خۆپاراستن لە گەلێك نەخۆشی و كەمكردنەوەی هەوكردن بە تایبەت نەخۆشی جومگەكان.
٢- نەهێشتنی قەبزی : بڕێكی زۆر لە ئاو و مادە ڕیشاڵییە تواوەكانی تێدایە كە دەبێتە چالاككردنی جووڵەی ڕێخوڵەكان و باشتركردنی تەندروستی كۆئەندامی هەرس و ڕزگار بوون لە قەبزی و خۆپاراستن لە شێرپەنجەی كۆڵۆن و كۆم .
٣- بۆ خانمانی دووگیان زۆر بە سوودە بە تایبەت لە مانگانەكانی سەرەتای سكپڕی چونكە دەوڵەمەندە بە فۆلێك ئەسید كە ڕۆڵێكی كارا دەبینێت لە گەشەی كۆئەندامی كۆرپەله و ڕێگری كردن لە نەخۆشییە زگماكیەكانی دڕكەپەتك .
٤- بۆ نەخۆشییەكانی دڵ و گورچیلە زۆر كەڵكی هەیە : دەوڵەمەندە بە كانزای پۆتاسیۆم و ترشی ئەمینی ستێرۆلین و ئاو كە یارمەتی دابەزندنی فشاری خوێن و چالاككردنی جووڵەی خوێن دەدات ، هەروەها وەك ماددەی دایروتێك كار دەكات كە دەبێتە هۆی زیادكردنی میز و نەهێشتنی هەوكردن و بەردی گورچیلە و میزەڵدان .
٥ – پاراستنی تەندروستی پێست : زوو چاكبوونەوەی برین و سووتاوی و خۆپاستن لە نەخۆشییەكانی پێست .
٦- كەمكردنەوەی ئازاری ماسولكانەكان : شووتی سوودی زۆرە بۆ نەهێشتن و كەمكردنەوەی ئازار و ئیفلیجی ماسولكەكان و هێواشكردنەوەی لێدانی دڵی وەرزشوانان لە كاتی وەرزش، چونكە ترشی ئەمینی سێڕۆلینی تێدایە كە لە ناو جەستەدا دەگۆڕێت بۆ ئارجنین كە زۆر گرنگە بۆ چالاككردنی سووڕی خوێن و كشانی بۆریەكانی خوێن، هەروەها ڤیتامین B6 تێدایە كە وزە دەبەخشێت بە لەش.
٧- بەهێزكردنی توانای سێكسی پیاوان.
٨- خۆپاراستن له شێرپەنجە: چونكە شووتی ماددەی لایكۆپینی تێدایه و دژە ئۆكسانێكی بەهێزە یارمەتی خۆپاراستن دەدات لە شێرپەنجە بە تایبەت شێرپەنجەی پڕۆستات و مەمك و منداڵدان و كۆڵۆن و كۆم.
شووتی:
٪ ٩٢ لە ئاو پێكهاتووە لەگەڵ ڕێژەیەك لەو ماددە ڕیشاڵانەی دەتوێنەوە ، ٪ ٧ لە كاربۆهێدراتی ساددە پێكهاتووە لەگەڵ ڕێژەیەك له ڤیتامین سی ، ڤیتامین ئەی ، بی ، فۆلیك ئەسید ، پۆتاسێوم ، له هەمان كات دا بڕێكی كەم لە كالۆری تێدایە.
ئەوانەی نەخۆشی شەكرەیان هەیە دەتوانن ڕۆژانە یەك بۆ دووقاشی بچووك بخۆن ، هەر قاشەی بە قەت كۆپێك بێت شووتی بخۆن لە نێوان ژەمەكان بە مەرجێك شەكرەیان كۆنتڕۆڵ كرا بێت و لە سەر سیستمی لۆكارب و كیتۆ و هاوشێوەكانی نەبن .
دكتۆر كامەران رسوڵ ژاژڵەیی
پسپۆڕی زانستی خۆراك
