دوای چەندین ساڵ لە كۆچی دوایی مام جەلال، سەرۆك كۆماری پێشووتری عێراق، جارێكی دیكە لە ماڵەكەی لە بەغدا سەركردەی حزبە عێراقییەكان، كە بە “هاوپەیمانی ئیدارەی دەوڵەت” ناسراون و حكومەت و پەرلەمانیان پێكهێناوە، كۆبوونەوە.
بافڵ جەلال تاڵەبانی، سەرۆكی یەكێتیی نیشتمانیی كوردستان لە ماڵی مام لە بەغدا سەركردەكانی ھاوپەیمانی ئیدارەی دەوڵەتی كۆكردەوە.
لە كۆبوونەوەكەدا سەركردەكانی ھاوپەیمانی ئیدارەی دەوڵەت و محەمەد شیاع سودانی، سەرۆك وەزیران و محەمەد حەلبووسی سەرۆكی ئەنجومەنی نوێنەرانی عیراق ئامادەن.
بەپێی زانیارییەكان، لە كۆبوونەوەكەدا لەسەر چوار ئاست و پرسی گرنگی سیاسی، لایەنەكان گفتوگۆ دەكەن لەسەر (تەواوكردنی كابینەی حكومەتی نوێ و پڕكردنەوەی پۆستە وەزارییەكان، یاسای ھەڵبژاردن، لیژنەكانی پەرلەمانی عیراق و مەترسییە ئەمنییەكانی پەیوەست بە سنووری توركیا و كۆماری ئیسلامی ئێران).
