سەرۆكی هەرێمی كوردستان سەرپەرشتیی كۆبوونەوەیەكی فراوانی نێوان هاوپەیمانان و وەزارەتی پێشمەرگەی دەكات سەبارەت بە پرۆسەی یەكگرتنەوەی هێزەكانی پێشمەرگە و ڕێكخستنەوەیان بەشێوەیەكی سەردەمیانە و دەڵێت: “پێویستە پڕۆسەی یەکخستنەوەی پێشمەرگە خێراتر بکرێت و ئامادەی هەموو هاوكارییەكم”.
بەپێی ڕاگەیەنراوێكی سەرۆكایەتی هەرێمی كوردستان، بە سەرپەرشتی نێچیرڤان بارزانی، سەرۆكی هەرێمی كرودستان، شاندێكی باڵای هێزی هاوپەیمانان بە سەرۆكایەتیی جەنەراڵ ماپیۆ مكفارلن، فەرماندەی هاوبەشی هێزی هاوپەیمان لە عێراق و سوریا و وەزارەتی پێشمەرگە و دەزگا پەیوەندیدارەكانی دیكەی هەرێمی كوردستان كۆبوونەوە، كە تێیدا كونسوڵی گشتیی ئەمریكا لە هەرێم ئامادە بوو.
وەك لە ڕاگەیەنراوەكەدا هاتووە، “بابەتی كۆبوونەوەكە گفتوگۆ بووە لەبارەی ڕێكخستنەوە و چاكسازی لە هێزی پێشمەرگە و هەڵسەنگاندن بۆ قۆناخەكانی جێبەجێكردنی ئەو پلانە، كە لە چوارچێوەی ڕێككەوتنی نێوان وەزارەتی پێشمەرگە و وەزارەتی بەرگریی ئەمریكا هەیە”.
بەشێكی دیكەی كۆبوونەوەكە تایبەت بوو بە باسكردنی ئەو ئاستەنگ و ئاڵنگارییانە، كە دێنە بەردەم پرۆسەی یەكگرتنەوەی پێشمەرگە و ڕێكخستنەوەیان بە شێوەیەكی سەردەمیانە لە چوارچێوەی وەزارەتی پێشمەرگە.
نێچیرڤان بارزانی لەو كۆبوونەوەیەدا هاوكارییە بەردەوامەكانی هاوپەیمانانی بۆ پێشمەرگە لە قۆناخ و بوارە جیاوازەكاندا بەرز نرخاند و جەختی لە خێراتركردنی هەنگاوەكانی یەكخستنەوەی پێشمەرگە و لابردنی بەربەستەكانی بەردەم پرۆسەكە كردەوە و ئامادەیی خۆیشی بۆ هەر هاوكاری و پشتیوانییەك لەمبارەیەوە نیشان دا.
جەنەرال مكفارلن، بەردەوامیی پشتگیری و هاوكارییەكانی هاوپەیمانانی بۆ پێشمەرگە لە بوارە جیاوازەكاندا و جێبەجێكردنی هەنگاوەكانی رێكخستنەوەی پێشمەرگە لە چوارچێوەی وەزارەتی پێشمەرگەدا بەشێوەیەك هەرێمی كوردستان ببێتە خاوەن هێزێكی نیشتمانیی یەكگرتوو، دووپات كردەوە.
