دوابەدوای دروست بوونی بۆچوونی جیاواز لە تۆرشە كۆمەڵایەتییەكان لەسەر قسەی پزیشكی پێشكەشكاری بەرنامەیەك، كە وتبووی “ئاوی زمزم پیرۆزە و شیفایە، بەلام چارەسەری نەخۆشی ناكات” پزیشكێك، كە پێشتر پۆستی باڵای لە وەزارەتی تەندروستی هەرێم هەبووە دەڵێت: “شفا و چارەسەر جیاوازن تێكەڵیان مەكەن “.
د. خاڵس قادر، بەڕێوەبەری گشتی پێشووی دیوانی وەزارەتی تەندروستی هەرێم بۆ (خەڵك) ڕایگەیاند، شفا و چارەسەر جیاوازن، چونكە شفا ناچێتە نێو لێكۆڵینەوە و تاقیكردنەوە، چونكە شفا لە لای خودایە و تاقی ناكرێتەوە، بەڵام چارەسەر لەلای پزیشكە، تاقی دەكرێنەوە و توێژینەوەیان لەسەر دەكرێت .
ئەو پزیشكە نموونە بە قورئان و هەنگوین دەهێنێتەوە و دەڵێت: “قورئان شیفایە، ئاوی زمزم شیفای پێوەیە، هەنگوین شیفای پێوەیە. ئەوانە شیفان، چارەسەر نین، بەڵام چارەسەر دەرمانە، نەشتەرگەریە، وەرزشە، نیشانە و نەخۆشیەكە باشتر دەكات یان ڕای دەگرێت یان لای دەبات بۆ ماوەیەك، بەڵام دەكرێت بگەڕێتەوە یان خراپتر ببێتەوە”.
جەختیشی كردەوە، چارە پڕۆسێسە، دەزاندرێت چییە و چۆنە، بۆیە دەسەلمێندرێت و دەچێتە ژێر تاقیكردنەوە، زانست پەی پیدەبات. بەڵام شیفا لە سەروو پڕۆسێس و تاقیكردنەوەیە، ڕێگاكەی باوەڕە و یەقینە و شیفا گەڕانەوەی باری تەندروستیە، چاكبوونەوەی تەواوە، جارێكیتر ناگەڕێتەوە.
د. خاڵس پێی وایە، “شیفا گەورەتر و فراوانترە لە چارەسەر، شیفا هەمیشە چارەسەری لەگەڵە، بەڵام چارەسەر مەرج نیە شیفای لەگەڵ بێت، دەكرێت هەندێك جار ببێتە شیفا”.
