لە شاری هەولێر دوو كەس دەستگیركران كە فێڵیان لە هاووڵاتییان كردووە و بۆ كۆكردنەوەی پارە هەست و سۆزیان جوڵاندوون.
پۆلیسی هەولێر بڵاویكردووەتەوە، بەشی پۆلیسی فریاكەوتنی هەولێر ئاگادار كرانەوە كە ئۆتۆمبێلێك لەجۆری (ئۆپڵ ڤیكترا) تاكسی لە شەقامی (٤٠) مەتری نزیك چێشتخانەی لیزا لە نێوەندی شەقام پەكی كەوتووە و دوو كەس بەناوەكانی (م. س. م.) و (م. ع. ح.) كۆمەكی بۆ كۆدەكەنەوە، دەستبەجێ هێزەكانی پۆلیس گەشتنە شوێنی مەبەست و دەركەوت كە ئۆتۆمبێلەكە پەكی نەكەوتووە و لەم ڕێگایەوە هەست و سۆزی خەڵكیان دەجوڵاند و بەفێڵ پارەیان لە خەڵك كۆدەكردەوە.
ئاماژە بە ئەوەش كراوە، دەست بەسەر ئۆتۆمبێلەكە داگیرا و هەردوو تۆمەتباری ناوبراویش دەستگیر كران.
پۆلیسی هەولێر ئەوەش دەڵێت، بەمەبەستی گرتنە بەری ڕێكارە یاساییەكان بەرامبەر بە هەردوو تۆمەتبار ڕادەستی بنكەی پۆلیسی ئاشتی كران.
