خەڵك-
دوای ماوەیەكی زۆر لە پێكهێنانی حكومەتی نوێی عێراق بە سەرۆكایەتی محەمەد شیاع سودانی، یەكێتی و پارتی لەسەر پۆستە وزاریەكانی بەغدا ڕێككەوتن و جگە لە سەرۆك كۆمار 3 پۆست بۆ پارتی و 2 بۆ یەكێتی دەبن.
بەپێی زانیارییەكان، یەكێتی و پارتی ڕێككەوتوون لەسەر ئەوەی پۆستی ڕاوێژكاری سەرۆك وەزیران بۆ كاروباری ئێزدییەكان و وەزارەتی ئاوەدانكردنەوە بۆ پارتی بێت و و وەزارەتی ژینگە بۆ یەكێتی بێت، لەكاتێكدا لە ماوەی ڕابردوودا ناكۆك بوون لەسەر دابەشكدرنی پۆستەكان.
لەكاتی پێكهێنانی حكومەتی عێراق وەزارەتی دەرەوە درا بە پارتی و لەلایەن فوئاد حسێن-ەوە بەڕێوە دەبرێت و وەزارەتی داد-یش درا بە یەكێتی و لەلایەن خالید شوانی-یەوە بەڕێوەدەبرێت.
بەهۆی پێدانی پۆستی سەرۆك كۆمار بە یەكێتی، سەرەڕای دەنگ پێدانی لەلایەن پارتییەوە و كشاندنەوەی كاندیدەكەی خۆی لەبەرامبەریدا، بەڵام پارتی جەختی لەوەدەكردەوە، كە پۆستە وزارییەكانی دیكە مافی خۆیەتی بەپێی بەركەوتەی هەڵبژاردن و تەنها یەك وەزارەت بە یەكێتی بدرێت، لە بەرامبەریشدا یەكێتی جەختی لە وەرگرتنی وەزارەتێكی دیكە دەكردەوە و بەهۆی ئەو ناكۆكییەشەوە تا ئێستا پۆستەكانی دیكەی كورد لە بەغدا پڕنەكرابوونەوە.
