ئەمڕۆ لە سلێمانی خۆپیشاندان دژی هێرشكردنەسەر فڕۆكەخانە بەڕێوەدەچێت
بڕیارە ئەمڕۆ یەك شەممە هاووڵاتیانی شاری سلێمانی لەسەر داواكاری دەستەیەك لە خەڵكی شارەكە، خۆپیشاندان بۆ شەرمەزاركردنی هێرشكردنەسەر فڕۆكەخانەی نێودەوڵەتی سلێمانی ڕێكبخەن.
لە بانگەوازێكدا بەناوی خەڵكی سلێمانییەوە هاتووە ” هێرشەكەی سەر فڕۆكەخانەی سلێمانی لە مانگی پیرۆزی ڕەمەزاندا كە هەموو كوشتار و شەڕ و ئاژاوەیەكی تێداحەرامكراوە، بە سەرەتای هەڕەشەیەكی مەترسیدار دەزانین و بە هێرش و پەلاماری سەر كەرامەت و شكۆی كوردستان بە گشتی و سلێمانی و خەڵكەكەی بە تایبەت دەزانین”.
دەستەیەك لە خەڵكی سلێمانی دەڵێن “ئێمە وەك كۆمەڵێك لە كەسایەتی و خەڵكی سلێمانی بۆ بەرپەرچدانەوەی ئەم هێرش و پەلامارە، داوا لە خەڵكی كوردستان دەكەین بە یەكدەنگ بەرپەرچی ئەم پەلامارە بدەنەوە و ڕێگە نەدەن دوژمنان لەژێر هەر ناو و پاساوێكدا بێت شكۆی خەڵكی كوردستان بشكێنن”.
ئاشكرایدەكەن “ئەمڕۆ یەكشەممە ٩-٤-٢٠٢٣ هەموومان لە ( سەھۆڵەكە) شەقامی سالمی شاری سلێمانییەوە كاتژمێر ٣ ی پاشنیوەڕۆ كۆدەبینەوە و بە یەك دەنگ دژی ئەم دەستدرێژییانە دەوەستینەوە”.
داوا لە خەڵكی تەواوی كوردستان دەكەن پشتیوانی سلێمانی بن و دەشڵێن”لە كۆبوونەوەو گردبوونەوەكەماندا تەنها ڕێگە بە هەڵكردنی ئاڵای پیرۆزی كوردستان دەدرێت”.
