بەڕێوەبەرایەتی ئاسایشی پارێزگای سلێمانی ڕایدەگەیەنێت، بكوژێكی داواكراو و لە یاسا هەڵاتووی بەڕەگەز عەرەبیان دەستگیر كرد، بە بڕیاری دادوەر ڕەوانەی دادگای لێكۆڵینەوەی ( الوركا) لە پارێزگای موسەننا دەكرێتەوە.
بەڕێوەبەرایەتی ئاسایشی پارێزگای سلێمانی بڵایكردەوە، لەدوای ئەوەی لە ڕۆژی ٢٠٢٣/٣/٢٩ زانیارییان بەدەست گەیشت لەسەر هاووڵاتیەكی بە رەگەز عەرەب بەناوی ( ح ، ك ، ح ) كە تۆمەتبارە بە كوشتنی كەسێك لە پارێزگای ( موسەننا) ی باشوری عیراق دوای ئەنجامدانی تاوانەكە بۆ خۆحەشاردان ڕووی لە شاری سلێمانی كردووە.
ئاماژە بۆ ئەوەشكراوە، كە دەستبەجێ هێزەكانی بەڕێوەبەرایەتی ئاسایشی پارێزگای سلێمانی دەستیانكرد بە كۆكردنەوەی زانیاری وورد و دیاریكردنی شوێنی تۆمەتبار، لە ماوەیەكی كورتدا توانیان تۆمەتباری هەڵاتوو دەستگیربكەن و دان بەتاوانەكەیدا بنێت .
ئەوەشخراوەتەڕوو، تۆمەتبار بە ماددەی ( ٤٠٦ ) لە یاسای سزادانی عیراقی داواكراوە، كە هەستاوە بە كوشتنی كەسێك و برینداركردنی ( ٣ ) كەسی تر لەسەر كیشەی كۆمەڵایەتی، پاش كۆتایی هاتنی لێكۆڵینەوە و لەبەر تایبەتمەندی ڕووداوەكە و شوێنی ڕودانی ڕووداوەكە بە بڕیاری دادوەر ڕەوانەی دادگای لێكۆڵینەوەی ( الوركا‌و ) لە پارێزگای موسەننا دەكرێتەوە.
