سەرۆكی ئەمریكا، جۆ بایدن ئاماژەی بەوە كرد پێویستە كۆمپانیاكانی تەكنەلۆجیا بەرپرسیارێتیی بگرنەئەستۆ بەرامبەر ئەو مەترسییانەی زیرەكی دەستكرد دروستیان دەكات و بەپێویستیشی زانی كۆنگرێس لەو چوارچێوەیەدا هەنگاو بگرێتەبەر.
جۆ بایدن لە كۆشكی سپی لەگەڵ ئەنجوومەنی راوێژكارانی زانست و تەكنەلۆجیا كۆبووەوە.
سەرۆكی ئەمریكا باسی لەوە كرد بەمەبەستی هەڵسەنگاندنی ئەو دەرفەت و مەترسییانەی زیرەكی دەستكرد هێناویەتە ئاراوە، كۆبوونەوەكەیان ئەنجامداوە و باسی لەوە كرد كە رەنگە زیرەكی دەستكرد هاوكار بێت بۆ رووبەڕووبوونەوەی كێشەكانی وەك نەخۆشییەكان و گۆڕانی كەشوهەوا، بەڵام لە هەمان كاتدا رەنگە مەترسیی ئابووریی و ئاسایشی نیشتمانیشی لێبكەوێتەوە.
جۆ بایدن باسی لەوە كرد كە پێی وایە بەرپرسیارێتی لەسەر شانی كۆمپانیاكانی تەكنەلۆجیایە پێش ئەوەی بەرهەمەكانیان پێشكەش بە خەڵك بكەن دڵنیابن لەوەی سەلامەتن و رایگەیاند: ”تۆڕی كۆمەڵایەتی نیشانیداین كە پێش گرتنەبەری رێوشوێنی دروست تەكنەلۆجیای بەهێز رەنگە زیانی هەبێت”.
سەرۆكی ئەمریكا ئاماژەی بەوەیش كرد، نەگرتنەبەری رێوشوێنی پێویست لەم چوارچێوەیەدا رەنگە كاریگەری خراپی لەسەر تەندروستی دەروونی و تێگەیشتن لە خود و هەستی گەنجان هەبێت.
جۆ بایدن لە وەڵامی پرسیارێكدا سەبارەت بەوەی زیرەكی دەستكرد مەترسییە یان نا، دەڵێت: ”بە تێپەڕبوونی كات دەیبینین. رەنگە”.
