كەمێك پێش ئێستا شاندی هەرێمی كوردستان گەیشتە بەغدا و بڕیارە لەسەر دۆسیەی نەوتی هەرێم لەگەڵ لایەنە پەیوەندیدارەكانی حكومەتی عێراق گفتوگۆ بكەن.
فەرمانگەی میدیاو زانیاری حكومەتی هەرێم بڵاویكردەوە، بەمەبەستی گفتوگۆكردن لەسەر دۆسیەی نەوتی هەرێم، شاندی هەرێمی كوردستان بەسەرۆكایەتی ئاوات جەناب نووری وەزیری دارایی و ئابووری و كەمال محەمەد وەزیری سامانە سروشتیيەكان بەوەكالەت و ئومێد سەباح سەرۆكی دیوانی ئەنجومەنی وەزیران گەیشتنە بەغدا.
ئاماژە بە ئەوەش كراوە، بڕیارە لەگەڵ لایەنە پەیوەندیدارەكانی حكومەتی عێراق چەندین دیدارو كۆبونەوە ئەنجام بدەن.
بەپێی زانیاری میدیاكانی پارتی دیموكراتی كوردستان جۆرێك لە ڕێككەوتن لەنێوان هەرێمی كوردستان و بەغدا هاتووەتە ئاراوە لەسەر نەوت و كۆتایی ئەم هەفتەیە هەناردەكردنی نەوت دەستپێدەكاتەوە.
بەپێی ڕاپۆرتی ئاژانسەكانی هەواڵ، كۆمپانیا نەوتییەكان لە هەرێمی كوردستان بەهۆی راگیرانی هەناردەكردنی نەوتەوە بەرهەمی رۆژانەی خۆیان كۆگا دەكەن و ئەوەش ڕەنگە بەشی چەند ڕۆژێك بكات و ناچار دەبن بەرهەمهێنان رابگرن.
ئاژانسی رۆیتەرز بڵاویكردووەتەوە كە توركیا بۆری نەوتی هەرێمی كوردستان -بەندەری جەیهانی داخستووە و مەترسی لەسەر بەرهەمهێنانی نەوت هەیە.
كۆمپانیا نەوتییەكان چاوەڕێی رێككەوتنی نێوان هەرێم و بەغدا لەسەر هەناردەكردنی نەوت دەكەن، بەوپێیە دوای بڕیارەكەی دادگەی پاریس دەبێت هەردوولایەن بگەنە میكانیزمێكی هاوبەش بۆ دەستكردنەوە بەهەناردەكردنی نەوت.
