وەزارەتی نەوتی عێراق بڕی هەناردە و داهاتنی نەوتی بۆ مانگی (شوبات)ی ڕابردوو بڵاوکردەوە، كە زیاتر لە 7 ملیار دۆلار داهات بووە.
وەزارەتی نەوتی عێراق لەڕاگەیەنراوێکدا ئاماژەی بەوەكردووە، بەپێی ئاماری کۆمپانیای بەبازاڕکردنی نەوتی عێراق (سۆمۆ)، بڕی هەناردەی نەوتی خاو لە مانگی (شوبات)ی 2023 گەیشتۆتە 92 ملیۆن و 255 هەزار و 610 بەرمیل و لەلایەن 35 كۆمپانیاوە كڕدراوە.
ڕوونیشی كردۆتەوە، هەر بەرمیلێك نەوت بە 76 دۆلار و 556 سەنت فرۆشراوە و كۆی گشتی داهاتەكەی 7 ملیار و 62 ملیۆن دۆلار بووە.
ئاماژەی بەوەشکردووە، “کۆی ئەو بڕە نەوتەی لە کێڵگە نەوتییەکانی ناوەڕاست و باشووری عێراقەوە هەناردە کراوە، بڕی 89 ملیۆن و 140 هەزار و 448 بەرمیل بووە، هاوکات ئەو بڕە نەوتەی لە کەرکوکەوە هەناردە کراوە لە ڕێگەی بەندەری جەیهانەوە 2 ملیۆن و 834 هەزار و 393 بەرمیل بووە”.
