بەغدا مووچەی فەرمانبەران دەنێرێت
سەرچاوە سیاسییە ئاگادارەكان دەڵێن ڕێككەوتنی نێوان حكوومەتی بەغدا و هەرێمی كوردستان خەرجكردنی مووچەی فەرمانبەرانی هەرێمیش لەلایەن بەغداوە دەگرێتەوە.
رۆژنامەی شەرقلئەوسەتی سعوودی ئەمڕۆ هەینی بڵاویكردەوە، سەركردە شیعەكان پێشوازییان لەئاساییكردنەوەی پەیوەندییەكانی نێوان هەرێم و بەغدا بەتایبەت لەگەڵ پارتی دیموكراتی كوردستان كردووە، ئەوەش دوای ڕێككەوتنی نێوان ئێران و عەرەبستانی سعوودیە.
سەرچاوەیەك بە رۆژنامەكەی راگەیاند، سەركردە سیاسییەكان خۆیان وەك بەشێك لە دروستكردنی بڕیاری هەرێمی دەزانن، بۆیە سازشكردن بۆ نەیارەكانیان لەناوخۆدا وەك هەستكردنە بە مەترسیداری پەرەسەندنەكانی ناوچەكە.
سەرچاوەكان دەڵێن: هەولێر دڵنیایی و گەرەنتی لە هێزە هەرێمییەكان بۆ چارەسەركردنی كێشەكان وەرگرتووە بەتایبەت دوای ڕێككەوتنی نێوان ریاز و تاران.
ئاماژە بەوەش دەكەن سەركردەكانی چوارچێوەی هەماهەنگی بە تەواوی بۆ چەسپاندنی بنەمایەكی نوێی ژیانی سیاسی لە وڵاتدا ئامادەن و رەوشەكە گوونجاوە.
