شەوی ڕابردوو ڕێوڕەسمەكانی چوارشەممە سوورە، دواین چوارشەممەی ساڵی كوردی و پێش جەژنی نەورۆز، لە زۆرینەی شارەكانی ڕۆژهەڵاتی كوردستان بۆ خۆپیشاندان و ناڕەزایەتی دەربڕین گۆڕدران و دەیان كەسیش بریندار بوون.
بەپێی سەرچاوە تایبەتە خۆجێیەكان، شەوی ڕابردوو لە شارەكانی مەهاباد، بۆكان، ورمێ، نەغەدە، پیرانشار، بانە، سەردەشت، سەقز، سنە، جوانڕۆ، دیواندەرە، كرماشان، سەرپێڵی زەهاو و چەند ناوچەی خۆپیشاندان بەڕێوەچوون.
لە زۆرینەی شوێنەكاندا پێكدادان لەنێوان خۆپیشاندەران و هێزە ئەمنییەكاندا دروستبووە، لە سنە و سەقز دەسڕێژی گولە خۆپیشاندەران كراوە.
بەپێی سەرچاوەكان لە پێكدادانەكانی سەقز و سنە ژمارەیەك خۆپیشاندەر بریندار بوون.
خۆپیشاندەران لە شەوی چوارشەممە سوورەدا درێژەیان بە ئەو ناڕەزایەتییانەدا كە بەر لە شەش مانگ بەهۆی كوژرانی ژینا ئەمینی كچە كوردی شاری سەقزەوە دەستیانپێكردووە و بەچەندین شێواز درێژەی هەیە.
بەپێی ئاژانسەكانی ئێران، 27 كەس لە شەوی چوارشەممە سوورە گیانیان لەدەستداوە و زیاتر لە چوار هەزار كەسیش بریندار بوون.
حیزب و لایەنە سیاسییەكان و چالاكەوانەكانی ڕۆژهەڵاتی كوردستان لەناوخۆ و دەرەوەی وڵات داوایان لە هاووڵاتیانی ڕۆژهەڵاتی كوردستان كردبوو ڕێوڕەسمەكانی جەژنی نەورۆز بۆ درێژەدان بە ڕاپەڕینەكانی ژینا ئەمینی بگۆڕن.
