كۆچەر جەمال بەڕێوەبەری بەنداوی دوكان ڕایدەگەیەنێت، شەپۆلی بارانبارینی ئەم دواییە بووە مایەی ژیانەوەی دەریاچەی دوكان و ئاستی ئاوی بەنداوەكەی بە بڕی 46 سم بەرزكردەوە .
كۆچەر جەمال ڕایگەیاندووە:”ئاستی ئاوی بەنداوی دوكان بەرزبۆتەوە، ئەمەش هاوكاتە لەگەڵ بارینی نزیكەی 60 ملم باران لەماوەی دوو ڕۆژی ڕابردوو”.
بە وتەی بەڕێوەبەری بەنداوی دوكان:”ئاستی ئاوی بەنداوەكە 46 سم بەرزبۆتەوە و ئاستی ئاوی دەریاچەكەش بەبڕی مەترێك و حەفتا سانتیمەتر بەرزبۆتەوە، بەراورد بە ساڵی ڕابردوو”.
هەر لەو چوارچێوەیەدا، بەرپرسێكی حكومی ئاماژە بە بەرزبوونەوەی ئاستی ئاوی بەنداوی دەربەندیخان كردووە بە نزیكەی 17 سم و ڕایگەیاندووە”ئەو ئاوەی ئێستا لە بەنداوەكەدایە، بەراورد بە ساڵی ڕابردوو زۆر زیاترە، هۆكاریی ئەمەش بۆ ئەو شەپۆلە بارانبارینە دەگەڕێتەوە كە لەم ماوەیەدا ڕووی لە ناوچەكە كرد”.
