باڵیۆزی ئەمریکا لە عێراق ڕایگه‌یاند، ئه‌مریكا پابەندە بە پاڵپشتیکردنی هەوڵەکانی حکومەتی هەرێمی کوردستان بۆ یەکخستنەوەی هێزەکانی پێشمەرگە و نوێکردنەوەیان بە مەبەستی دڵنیابون لە تێکشکاندنی یەکجارەکی داعش.
ئەلینا رۆمانۆسکی، باڵیۆزی ئەمریکا لە عێراق له تویتێكدا ئاماژەی بەوەكردووە، “لۆید ئۆستن، وەزیری بەرگریی ئه‌مریكا لە هەولێر لەگەڵ نێچیرڤان بارزانی، سەرۆکی هەرێمی کوردستانی عێراق کۆبوەوە بۆ جەختکردنەوە لە پابەندییمان لەگەڵ حکومەتی هەرێمی کوردستان”.
ڕاشیگەیاندووە، ویلایەتە یەکگرتوەکان پابەندە بە پاڵپشتیکردنی هەوڵەکانی وەزارەتی پێشمەرگەی حکومەتی هەرێمی کوردستان بۆ یەکخستنەوەی هێزەکانی پێشمەرگە و نوێکردنەوەیان بە مەبەستی دڵنیابون لە تێکشکاندنی یەکجارەکی داعش.
ئه‌مڕۆ سێ شه‌ممه، دوای سەردانەكەی بۆ بەغدا، لۆید ئۆستن، وه‌زیری به‌رگریی ئه‌مریكا گه‌یشتنه هه‌ولێر و له‌گه‌ڵ نێچیرڤان بارزانی، سه‌رۆكی هه‌رێمی كوردستان كۆبووه‌وه و لە كۆنگرەیەكی ڕۆژنامەوانیدا ڕایگەیاند، هەولێر و بەغدا دەبێت پێکەوە کاربکەن بۆئەوەی کارەکان لەبەرژەوەندی هەردولا بێت.
ڕاشیگەیاند، پێویستە سەرکردە سیاسییەکانی کورد واز لە ناکۆکی و جیاوازیەکان بهێنن و پێکەوە کاربکەن بۆئەوەی ئاسایش و ئارامی بۆ هەرێمی کوردستان دابین بکەن.
