عەلی باپیر؛ كەس بەو ئاواتە نەگەیشت كە ڕاپەڕینی بۆ كرا

سەرۆكی كۆمەڵی دادگەری كوردستان لە یادی 32 ساڵەی ڕاپەڕیندا ڕایدەگەیەنێت، جگە لە كەسانێكی مشەخۆری دەوری حوكمڕانان، هیچ كەس لاموجیمیی لەوەدا ناكات، كە خەڵك بە گشتی هەست بە ڕەنجەڕۆیی و دەستخەڕۆیی و نائومێدییەكی قووڵ و بە ئازار دەكات و دەشڵێت،”زۆرێك لەوانەش كە پێشمەرگایەتی و خەبات و فیداكارییان كردووە پەشێمانیی دەردەبڕن”.

عەلی باپیر ، سەرۆكی كۆمەڵی دادگەری كوردستان لە پەیامێكدا ڕایگەیاندووە، سی و دوو ساڵ لەمەوبەر لەڕۆژی ٥/٣/١٩٩١ز دا و لە شاری ڕانیەی دەروازەی ڕاپەڕینەوە، یەكەمین چەخماخەی بەرخۆدان و شۆڕشی جەماوەریی بریسكەی داو، دواتر زۆر بە خێرایی بەرەو سەرجەم شار و شارۆچكەكانی كوردستان – باشووری كوردستان پەرەی ستاند، هەتا تێكڕای تاوڵی ڕەشی ڕژێمی بەعسی سووتاند.

دەشڵێت،”ئێستا بەداخەوە زۆر بە زەقیی و ڕەقیی، قۆرخكرانی نیشتیمان و خێروبێرەكانی بۆ چەند ماڵێك، دەبینرێ و، هەموو لایەكیش دەبینن پەرلەمان و حكوومەت چەندە فاشیل و بێ بڕست و بێ هەست و هەڵوێستن لەبەردەم وەڵامدانەوەی پرسیارەكانی خەڵك و جەماوەر و بەدەمەوەچوونی چارەسەری گرفت و كێشەكانی ژیان و گوزەرانی خەڵك”.

یادی سی و دوو ساڵەی ڕاپەڕین و هەڵوەستەیەك
بەڕێزان، خەڵك و جەماوەری هەرێمی كوردستان و دەرەوەی هەرێم و ڕەوەندی هەندەران!
سی و دوو ساڵ لەمەوبەر لە: ٥/٣/١٩٩١ز داو لە شاری ڕانیەی دەروازەی ڕاپەڕینەوە، یەكەمین چەخماخەی بەرخۆدان و شۆڕشی جەماوەریی بریسكەی داو، دواتر زۆر بە خێرایی بەرەو سەرجەم شار و شارۆچكەكانی كوردستان – باشووری كوردستان – پەرەی ستاند، هەتا تێكڕای تاوڵی ڕەشی ڕژێمی بەعسی سووتاند و، خەڵك و جەماوەی ژێر چەپۆك و ستەمدیدە و فززە لێبڕاوو تەنگەتاوكرا و، هەناسەی ئازادیی هەڵمژی و، لە قووڵایی دڵیەوە هەستی كرد كە لە وڵات و زێدی خۆیدا سەربەست و دەستكراوەیە، دواتریش لە ساڵی داهاتوودا – ١٩٩٢ز – هەڵبژاردن كراو، پاشان پەرلەمان و دواتریش كابینەی حكوومەت پێك هێنرا …
بەڵام ئایا ئێستا ئەوەی خەڵك و جەماوەری كوردستان خەونیان پێوە دەدی و، بەتەمای بوون، چەندەی لێ هاتۆتەدی و چی لێهاتوە؟!
پێم وایە جگە لە كەسانێكی مشەخۆری دەوری حوكمڕانان، هیچ كەس لاموجیمیی لەوەدا ناكات، كە خەڵك بە گشتیی هەست بە ڕەنجەڕۆیی و دەستخەڕۆیی و نائومێدییەكی قووڵ و بە ئازار دەكات و، زۆرێك لەوانەش كە پێشمەرگایەتیی و خەبات و فیداكارییان كردوە، پەشێمانیی دەردەبڕن، وەك لە چەند كتێب و یادداشتنامەیەكی وەك: (ئەو ڕۆژانەی نیشتیمان هی هەمووان بوو)، (بەخەونی گەورەوە كەوتینە ڕێ)، (ئەزموون و یاد)دا دەردەكەوێ!
چونكە ئێستا – بەداخەوە – زۆر بە زەقیی و ڕەقیی، قۆرخكرانی نیشتیمان و خێروبێرەكانی بۆ چەند ماڵێك، دەبینرێ و، هەموو لایەكیش دەبینن پەرلەمان و حكوومەت چەندە فاشیل و بێ بڕست و بێ هەست و هەڵوێستن لە بەردەم وەڵامدانەوەی پرسیارەكانی خەڵك و جەماوەر و، بەدەمەوەچوونی چارەسەری گرفت و كێشەكانی ژیان و گوزەرانی خەڵك و، دابینكردنی پێداویستییە سەرەتاییەكانی ژیانیان‌دا لە: ئاو و كارەبا و سووتەمەنیی و جێگا و ڕێگا و دەرمان و چارەسەر و…هتد!
بێگومان چارەسەری ڕیشەیی ئەم دۆخەش، ڕاستكردنەوەی جۆری بیركردنەوەی حوكمڕانانی هەرێمەكەمانە، كە هەمیشە سوورن لەسەر ئەوەی نەخشە و دیزاین (تصمیم)ی بەڕێوەبردنی هەرێم بە جۆرێك بێ، بەرژەوەندییە ناشەرعییەكانی كەمینەیەكی ملیاردێر – بگرە چەند ماڵێك – لەسەر حیسابی خەڵك و جەماوەر، دابین بكات، بەبێ چاو بە ژیان و گوزەرانی تەنگ و تاڵی خەڵك‌دا گێڕان ‌و، سەر بەرزكردنەوە بەرەو ئاسمان و، بیركردنەوە لە وەستان لەبەردەم دادگای خوای زاڵی دادگەردا!
هەروەها بە بێ دەرس و پەند وەرگرتن لە تێكڕای حوكمڕانە ستەمكار و خۆسەپێن و، هەموو شت بۆخۆ قۆرخكەرو، هیچ شتێك بە خەڵك ڕەوا نەبینەرەكان، مەگەر بە مەرجی دەستبەرداربوونی عەقڵ و ئیرادەیان و، ڕێشمەی زەبوونیی و كۆیلایەتیی لەمل كردن، كە سەرەنجامیان بریتی بووە لە فڕێدرانە زبڵدانی مێژووەوە، بە عەیبداریی لای خەڵك و دنیا و، گوناهباریی لای خواو قیامەت!
لە ڕابردووش‌دا بەندە زۆرم هۆشداریی دڵسۆزانە بە حوكمڕانانی هەرێم بەتایبەت و، خەڵك و جەماوەرەكەی بە گشتیی داوە و، هەندێك لە بەرهەم و نووسینەكانم تایبەت كردوون بەو بابەتەوە، وەك:
١- كوردستان بۆ وێران بوو و، چۆن ئاوەدان دەبێتەوە؟ – 1989.
٢- چارەسەری كێشەی كورد لە نێوان ئیمان و پەرلەمان‌دا- 1992.
٣- ڕوانینێكی ئیسلامییانە بۆ واقیعی ئێستامان… گرفت و چارەسەر -2016.
٤- قوڕئان و پاكسازیی و چاكسازیی لە هەرێمی كوردستان دا- 2018.
لەم ماوەیەش‌دا لە زۆر لاوە هۆشداریی بە حوكمڕانان دراوە، تەنانەت لەلایەن نەتەوە یەكگرتووەكان و، ئەمریكاشەوە، كە ئەم هەرێمە ناتوانێ بەمجۆرە بەردەوام بێ و، ئەگەر لادانەكانی حوكمڕانییە سەقەتەكەی ڕاست نەكرێنەوە و چارەسەر نەكرێن، بەرەو هەرەسهێنان مل دەنێ!
ناشزانم ئایا حوكمڕانە لە خواو خەڵك بێ خەبەرەكان، فریای ئەوە دەكەون هەرێم لە سەربەفەتارەت چوون بپارێزن، یان جارێكی دیكەش هەر سواری سەری خۆیان دەبن و، نیوە هەرێمە شەق و شڕەكەش، بە دەردی نیوە فەوتاو و دۆڕێنراوەكە دەبەن و، سەروەرییەكی دیكەی بۆش تۆمار دەكەن؟
بە دڵنیاییش بناغەی گۆڕانكاریی و پاكسازیی و چاكسازیی و ڕاستكردنەوەی ئەم دۆخەی هەرێم، خۆگۆڕینە: { إِنَّ اللَّهَ ڵا یُغَیِّرُ مَا بِقَوْمٍ حَتَّیٰ یُغَیِّرُوا مَا بِأَنْفُسِهِمْ ۗ } الرعد – ١١ -، خۆ گۆڕینییش زۆر شت دەگرێتەوە، بەڵام لێرەدا مەبەستم دوو شتی بنەڕەتییە:
یەكەم: دەرككردنی ئەو ڕاستییە كە ئەم وڵاتە خوا بۆ هەموومانی ڕەخساندوە و خێر و بێرەكەشی هی هەمووانە، نەك تەنیا هی چەند ماڵێك! وەك خوا فەرموویەتی: {خَڵقَ ڵكُمْ مَا فِی الْأَرْچِ جَمِیعًا} البقرە -٢٩-، واتە: ئەوەی لە زەویدایە بۆ هەمووتانی دروستكردوە.
دووەم: دڵنیابوون لەو ڕاستییە كە سەرجەم كۆمەڵگەكان بەهۆی ستەمەوە ڕووخاون: { ۆكَمْ قَصَمْنَا مِنْ قَرْێەٍ كَانَتْ ڤَالِمَەً } اڵانبیا‌و – ١١ -، ستەم و گەندەڵیی و پۆخەڵیی هەرێمی كوردستانیش، یەكجار بێڕەزا و خەست و بێ تام بووە!
بە هیوای ئەوەی بەرلەوەی كار لە كار بترازێ، كاربەدەست و حوكمڕانانی هەرێم بوێرانە دان بەهەڵەی خۆیان‌دا بنێن و، جوامێرانە تەحەممولی بەرپرسیارێتیی بكەن و، كارێك نەكەن پەنجەی پەشێمانیی بگەزن و، كۆتایی بە عەیبداریی و شەرمەزاریی لای خەڵك و، گوناهباریی لای خوا بێنن و، بەر لە حیزب و خزم، خوا و خەڵك ببینن‌ و، لە قاوغ و قەپێلكی گچكە و تەسكی بەرژەوەندییە ناشەرعییە تایبەتییەكان بێنەدەرێ‌ و، بچنە نێو بازنەی فراوانی خواپەرستیی و خەڵك دۆستیی و، نەتەوە پەروەریی و نیشتیمان پەروەریی و، كارێك بكەن خوا لە خۆیان ڕازیی بكەن و، خەڵكەكەیان دڵخۆش و، وڵاتیشییان ئاوەدان بكەن.
عەلی باپـیر
١٢ی شەعبانی ١٤٤٤ك
٤/٣/٢٠٢٣ز