نێچیرڤان بارزانی سەرۆكی هەرێمی كوردستان ڕایدەگەیەنێت:”سیاسەتی ئەوان لە كوردستان، پشتیوانییە لە حكومەتەكەی محەمەد شیاع سودانی سەرۆك وەزیران”.
بارزانی لە كۆڕبەندی ساڵانەی هەولێر ڕایگەیاند:”سودانی خواستی هەیە كێشەكانی نێوان بەغدا و هەرێم چارەسەر بكات، قوڵایی ستراتیژی ئێمەش بەغدایە، ئایندەی عیراق باشتر دەبێت لەڕێی هەنگاونان بەرەو فیدراڵی و چەسپاندنی بنەماكانی”.
بە وتەی سەرۆكی هەرێمی كوردستان:”عیراق و هەرێمی كوردستان جێبایەخی گەورەن لەسەر ئاستی نێودەوڵەتی، سەقامگیریی و ئاسایشی عیراق كاریگەریی ئەرێنی دەبێت لەسەر سەقامگیریی هەرێم، بەهێزبوونی هەرێمیش مەترسییە نییە بۆ عیراق، پێچەوانەكەی ڕاستە، ئێمە تەواوكەری یەكترین”.
نێچیرڤان بارزانی ئاماژە بە كاركردن و جموجۆڵی كوردستان دەكات لەچوارچێوەی دەوڵەتی عیراقی و لەسەر بنەمای دەستور و هەڵوێستی سیاسی و دەڵێت:”عیراق بە قۆناغێكی نوێدا تێدەپەڕێت و وڵاتان چاویان تێبڕیوە كە خۆی لە هەڵسانەوەی سیاسی و ئابووریدا دەبينێتەوە، لەو چوارچێوەیەشدا هەرێمی كوردستان دەتوانێت كار بۆ سەقامگیریی و ئاسایشی عیراق و تەواوی ناوچەكە بكات”.
نێچیرڤان بارزانی پێیوایە:”عیراق و هەرێمی كوردستان دەتوانن ڕۆڵێكی كاریگەر ببینن لە بواری وزەدا، هەلی زێڕین هەیە، تا ڕۆڵێكی ڕاستەقینەیان هەبێت لە دۆسێی وزەدا”.
بە بۆچوونی بارزانی:”عیراق ناتوانێت بەشێك بێت لە جەمسەرەكانی ململانێ لە جیهاندا، ناتوانێت پشتیوانی جەمسەرێك بكات لەسەر حیسابی جەمسەرێكی تر، دەكرێت ببێتە پردێك بۆ دۆزینەوەی چارەسەر لەنێوان جەمسەرەكاندا، ئەمەش لەئێستادا كاری لەسەر دەكرێت”.
