پزیشكێكی ڤێتێرنەری ڕێنمایی هاووڵاتیان دەكات تاوەكو بتوانن لە كاتی كڕینی ماسی دا، شارەزا بن و بتوانن ماسییەكی پاك و تازە و تەندروست هەڵبژێرن و بیكڕن.
شاڵاو عارف، لێپرسراوی هۆبەی كوشتارگەی سلێمانی بۆ (خەڵك) ئاماژەی بەوەكرد، “سەلامەتی خۆراك زنجیرەیەكە لە كێڵگەوە دەست پێ دەكات بە پڕۆسەی بازاڕكردن تاكو دەگاتە سەر سفرە و خوان.
سەبارەت بەوەی چۆن ماسی نوێ و تەندروست لە بازاڕدا هەڵدەبژێریت؟ ڕوونی كردەوە، بۆ دڵنیا بوون لە ماسی نوێ پێویستە سەیری (چاو و گوێچكە و توندی گۆشتی ماسیەكە و پوولەكەكانی) بكەیت.
دەشڵێت: “دەبێت چاوی ماسییەكە ڕوون و بریقەدار و دەرپەڕیو بێت، هەروەها گوێچكەی ماسیەكە سووری بریقەداری لینج بێت و نابێت ڕەنگی قاوەیی بێت و دەبێت بۆنیشی ئاسایی بێت”.
جەختیشدەكاتەوە، گۆشتی ماسیەكە بەجۆرێك توند بێت، كە پەنجەت لەسەر دانا و لات برد گۆشتەكە بگەڕێتەوە شوێنی خۆی و هیچ برینێك لەسەر پێستەكەی نەبێت، هەروەها پوولەكەكانی بریقەدار بێت و بە تووندی بە پێستەكەوە نووسابێت و ئاسان هەڵنەوەرێت.
