هەردوو شاندی حكومەتی عێراق و حكومەتی هەرێمی كوردستان ڕێككەوتن لەسەر پێكهێنانی لیژنەی هاوبەش بۆ داڕشتنی پڕۆژە یاسای نەوت و گازی فیدڕاڵی.
حكومەتی هەرێمی كوردستان لە ڕاگەیەنراوێكدا ئاماژەی بەوەكردووە،، ئەمڕۆ یەک شەممە، ١٩ی شوباتی ٢٠٢٣، شاندی حکومەتی هەرێمی کوردستان لە بەغدا لەگەڵ شاندی حکومەتی فیدڕاڵی- وەزارەتی نەوت کۆبووەوە.
ڕاشیگەیاندووە، لە کۆبوونەوەکەدا بڕیاردرا لیژنەیەکی ھاوبەش پێکبھێنرێت بۆ ئامادەکردنی و داڕشتنی پرۆژە یاسای نەوت و گازی فیدڕاڵی.
ئەمە لەكاتێكدایە، كە بەیانی ئەمڕۆ شاندی دانووستانكاری حكومەتی هەرێم گەیشتەوە بەغدا بۆ دەستپێكردنەوەی گفتوگۆكان لەسەر پڕۆژە یاسای بودجە و یاسای نەوت و گاز.
شاندەكە پێكهاتوون لە ئاوات جەناب نوری، وەزیری دارایی و د. ئومێد سەباح، سەرۆكی دیوانی ئەنجوومەنی وەزیرانی و كەمال محەمەد، وەزیری سامانە سروشتییەكان بە وەكالەت و سەرۆكی فەرمانگەی هەماهەنگی و وتەبێژی حكومەت.
