دەزگای هەواڵگری عیراق ڕایدەگەیەنێت، دوای كۆكردنەوەی زانیاری وورد لەسەریان توانرا 88 تۆمەتبار بەتۆمەتی بە قاچاخبردنی دراو بۆ دەرەوەی وڵات دەستگیربكەن، تیمەكانیشیان سەركەوتوبوون لە هەڵوەشاندنەوەی زۆربەی تۆڕەكانی یاریكردن بە نرخی دۆلار.
عەمید حسێن عەباس، بەڕێوبەری ڕاگەیاندنی دەزگای هەواڵگری و لێكۆڵینەوەی فیدڕاڵی سەر بە وەزارەتی ناوخۆی عیراق لە ڕاگەیەنراوێكدا بڵاویكردەوە، ڕێكارەكانی بەدواداچوون و لێپێچینەوە لەو كەسانەی، یاری بەنرخی دۆلار دەكەن بەردەوامن، تیمەكانیشیان سەركەوتوبوون ، لەهەڵوەشاندنەوەی زۆربەی تۆڕەكانی یاریكردن بەنرخی دۆلار و دەستگیركردنیان.
ڕاشیگەیاندووە، پلانی بۆسەدانان لە بازگەكان و زۆر سنورداركردنی قاچاخی دراوی بۆ دەرەوەی وڵات سەركەوتوو بووە، لەماوەی رابردوشدا 88 كەسیان دەستگیركردووە، كە تۆمەتبارن بە قاچاخچێتی دراو .
ئاشكراشیكردووە، ڕێوشوێنەكانی حكومەت بۆ ئاسانكاری گەیشتن بە پلاتفۆرمی ئەلیكترۆنی لەلایەن هاوردەكارانەوە بەهەموو جۆرەكانیەوە بەردەوامە و هەروەها بڕیاری بانكی ناوەندی بۆ ڕێگریكردن لەمامەڵەكردن بە دۆلار لەلایەن كەرتەكانی حكومەتەوە هۆكاربوون لە كەمكردنەوەی خواست لەسەر دۆلار لە بازاڕە ناوخۆییەكان.
