دەستەی گشتی كەشناسی و چاودێری بومەلەرزەزانی عێراق ڕایدەگەیەنێت، وڵاتەكەی دوورە لەكارەساتی هاوشێوەی توركیا و سوریا و ئێران، ئەو ناوچانەش دەستنیشان دەكات كە بە سێگۆشەی بوومەلەرزە ناسراون لە عیراقدا “ناوچەكانی سلێمانی كە بەشێكیان چەمچەماڵ و كەلار، خانەقین، مەندەلی لە دیالە، بەدرە لە واست” دەگرێتەوە.
عامر جابری ، بەڕێوەبەری راگەیاندنی دەستەی گشتی كەشناسی و بومەلەرزەزانی لە لێدوانێكیدا رایگەیاندووە، زۆربەی ئەو وڵاتانەی كە كارەساتی سروشتییان تێدا ڕوودەدات، دەریای گەورە و ناوچەی شاخاوی زۆر فراوانەكانیان هەیە، كە تێیدا جوڵەی بەرد و توێكڵی زەوی هەمیشە زۆرە، هەر بۆیە سەرجەم ئەو بومەلەرزانەی لەرابردو لە عێراق تۆماركراون نەگەیشتون بەگوڕی زیاتر لە 4 پلەی رێختەر.
ڕاشیگەیاندووە، ئەو بومەلەرزانەی كە لەهەردوو وڵاتی دراوسێی ئێران و توركیا ڕودەدەن، دەنگدانەوەیەكی كەمیان لەسەر عێراق دەبێت، هەرچەندە عێراق دەكەوێتە سەر پلێتی بومەلەرزەیی لە زنجیرە چیای زاگرۆس كە هاوسنورە لەگەڵ باكوری توركیا و لە باكوری ڕۆژهەڵاتەوە هاوسنورە لەگەڵ باشوری ئێران.
ئاشكراشیكردووە، كە دەستەكەیان ئەو ناوچانەیان دەستنیشان كردووە، كە بە سێگۆشەی بومەلەرزە لە عیراق ناو دەبرێن، كە ئەوانیش “ناوچەكانی سلێمانی كە بەشێكیان چەمچەماڵ و كەلار، هەروەها خانەقین، مەندەلی لە دیالە، بەدرە لە واست”دەگرێتەوە.
