لە خوێندنگەی هەولێری نموونەیی دوێنێ خوێندكارێك بەچەقۆ هاوپۆلێكی بریندار دەكات و تا ئێستا ئەو خوێندكارە 4 نەشتەرگەری بۆ كراوە.
ئالان نەشئەت، خاڵی ئەو خوێندكارەیە دوێنێ لەسەر نرخی گوڵێك بەچەقۆ لەلایەن هاوپۆلێكی بریندار دەكرێت و بە(خەڵك)ی ڕاگەیاند، هاوپۆلێكی كوڕەكەیان لە خوێندنگەی هەولێری نموونەیی، كە پۆلی ۹ی بنەڕەتین ١٤ بە چەقۆ خوشكەزاكەی بریندار دەكات و لەدوێنێوە ٤ نەشتەرگەریان بۆ كردووە.
دەشڵێت: “بەهۆی چەقۆكەوە گەدەی بریندار بووە و دوو سانتیمەتر زیاتر گەدەی دوراوەتەوە، لەگەڵ دوورینەوەی پشتی و شانی ڕاستی برینداربووە بەهۆیەوە پەنجەكانی كارناكات و پزیشك سەرقاڵی چارسەرە بۆی، بەڵام ئێستا لەدوێنێ تەندرووستی باشترە”.
لەبارەی هۆكاری ڕووداوەكە ئەوەی خستەڕوو، لەگرووپ هاوپۆلی خوشكەزاكەی پێی وتوە گوڵ دێنێ لە ١٤/٢/٢٠٢٣ لە خوێندنگە دەیفرۆشێتەوە، ئەویش وتویەتی گوڵێك و ورچێكی بۆبێنێت تابیكاتە دیاری بەدایكی، بڕەكەشی ١٠ هەزار دینار بووە، بەڵام دوای ئەوەی گوڵەكەی پێدەدات دەڵێت: دەبێت ٥٠ هەزار دینارم پێبدەی، بۆیە خوشكەزاكەی ڕەتی دەكاتەوە ئەو پارە زۆر بدات، بۆیە بەچەقۆ هێرش دەكاتە سەری و هەڕەشەش لە هاوپۆلەكانی تری دەكات قسە نەكەن، بەڵام گرتەی ڤیدیۆیی هەیە.
وتیشی، “ئێستا ئەو خوێندكارەی بەچەقۆ هێرشی كردۆتەوە سەر كوڕەكەیان دەستگیركراوە”.
