ئاسایشی ڕۆژئاوای سلێمانی دەستگیركردنی گرووپێكی هەشت كەسی لە شارۆچكەی تەكیەی چەمچەماڵ ڕادەگەیەنێت.
بەپێی ڕاگەیاندراوەكەی ئاسایشی سلێمانی، “ئەو هەشت تیرۆرستە لە 2004ـەوە پەیوەندییان بە رێكخراوی تیرۆریستی قاعیدەوە كردووە و بەشداربوون لە ئەنجامدانی چەندین كاری تاوانكاری و تیرۆریستی و دواتر بەیعەتیان بە تیرۆریستانی داعش داوە.”
ئاماژە بە ئەوەش كراوە، ئەو كەسانە “تاقمێكی تیرۆریستین، لە یاسا هەڵاتبوون و لە سنووری قەزای چەمچەماڵ خۆیان حەشاردابوو.”
باس لە ئەوەش كراوە، دوای ڕەزامەندی دەزگای ئاسایشی هەرێم، لێكۆڵینەوەی لەبارەی ئەم كەیسەوە دەستیپێكرد و بەڵگەی دروست لەسەر پێشینەی تاقمەكە دەستكەوت و بەبڕیاری دادوەری لێكۆڵینەوە رۆژی 5ی 2ی 2023 لە چەند هەڵمەتێكی جیاجیادا هێزەكانی بەڕێوەبەرایەتیمان بە هاوكاری هێزەكانی ئۆپەراسیۆنی دەزگای ئاسایشی هەرێم، بەڕێوەبەرایەتیی ئاسایشی سلێمانی، 8 تۆمەتباری لە یاسا هەڵاتوو كە داواكراوبوون لە دادگاكانی عێراق دەستگیركران.
