وتەبێژی حکومەتی هەرێمی کوردستان سێ رۆژ پشووی لە دامودەزگاکانی حکومەتی هەرێمی کوردستان راگەیاند، بەڵام دابەشکردنی مووچە بەردەوام دەبێت.
جووتیار عادل، وتەبێژی حکومەتی هەرێمی کوردستان بڵاویکردووەتەوە، بە مەبەستی پاراستنی گیانی هاووڵاتییان و پشتبەستن بە ڕاپۆرتی وەزارەتی گواستنەوە و گەیاندن، بۆ ماوەی سێ ڕۆژ (٧ و ٨ و ٩ی شوباتی ٢٠٢٣)، لە هەموو دامودەزگاکانی هەرێمی کوردستان بە ناوەندەکانی خوێندنی حکومی و ناحکومیی هەردوو وەزارەتی پەروەردە و خوێندنی باڵا و توێژینەوەی زانستی، پشووی فەرمی دەبێت.
وتەبێژی حکومەتی هەرێم دەشڵێت:”لەگەڵ ئەوەشدا، جگە لە ئێشکگریی هەردوو وەزارەتی ناوخۆ و تەندروستی لە بەردەوامیدان بە پێشکەشکردنی خزمەتگوزارییەکان و حاڵەتی لەناکاو، پڕۆسەی دابەشکردنی مووچەی فەرمانبەرانی هەرێمی کوردستان بەردەوام دەبێت”.
