لێۆنێل مێسی ئەستێرەی ئەرجەنتینی و هێرشبەری پاریس سان جێرمان، باس لە یادگارییەكانی بردنەوەی ناسناوی مۆندیالی قەتەر 2022 دەكات لەگەڵ هەڵبژاردەی وڵاتەكەی و ئەو ساتانە بە باشترین لە كاروانی یاریكردنیدا وەسف دەكات.
مێسی تەمەن 35 ساڵ بۆ بەرنامەی “بیرۆس دی لا كالی” ڕایگەیاند:”لەو دەمەی بووین بە پاڵەوانی مۆندیال، هەموو شتێك بۆ من و ئەوانی تر گۆڕانكاریی بەسەرداهات، ئێستا دەتوانیین سەربەرزبین و بڵێین ئێمە پاڵەوانی جیهانیین، ئەوەی لە كاروانی خۆمدا زۆر خەوم پێوەدەبینی، هاتەدی”.
بە وتەی مێسی:”شەوێك بەر لە ڕووبەڕووبوونەوەی كۆتایی، یەكترمان هاندا و باسی ئەو یاریانەمان كرد كە بەدرێژایی جامی جیهان ئەنجامماندا، نیگەرانی باڵی بەسەرماندا نەكێشا، من بۆخۆم توانیم بە باشی بنوم، بیركردنەوەكانم ئیسراحەتیان كرد”.
