كوردانی دانیشتووی وڵاتی بەریتانیا لە لەندەن، بۆ پشتیوانی لە سەرهەڵدانەكانی ژینا ئەمینی لە ڕۆژهەڵاتی كوردستان و ئێران گردبوونەوە.
بۆ جاری دووەم لە شاری لەندەنی پایتەختی بەریتانیا، رەوندی كوردی و دۆستانی كورد بەشدارییان لە خۆپیشاندانێكی جەماوەری گەورەدا بۆ پشتیوانی راپەڕینەكانی ژن، ژیان، ئازادی كرد.
خۆپیشاندەران لە شەقامەكانی لەندەن بە بەرزكردنەوەی ژمارەیەك پۆستەر و لافیتە و وتنەوەی دروشم پشتیوانییان لە سەرهەڵدانەكانی ژن، ژیان، ئازادی لە رۆژهەڵاتی كوردستان و ئێران دەكرد.
هاوكات خۆپیشاندەران داوای ئازادیی گیراوانی سیاسیان دەكرد و سەپاندنی سزای لەسێدارەدانیان بەسەر خۆپیشاندەراندا ئیدانە كرد.
خۆپیشاندەران لە بەردەم كەناڵی بی بی سی تا سەنتەری سكوێر ڕۆیشتن و بە بەردەوامی لە شەقامەكاندا دروشمی ژن ژیان ئازادییان دەوتەوە.
نەتەوەكانی ئێران وەك بەلوچ، عەرەبی ئەهواز، كورد و فارس بەشدارییان لە خۆپیشاندانەكەدا كرد و ئەو نەتەوانە و چەند چالاكوانێكی فمینیست و مرۆڤی ئازادیخواز بە زمانی ئینگلیزی، دژی سەركوتكارییەكانی ئێران ڕاگەیاندراویان خوێندەوە و وتەیان پێشكەش كرد.
