پزیشكان و پسپۆڕانی بواری تەندروستی و خۆراكی جەخت لە گرنگی شیرپێدانی سروشتی بە منداڵان دەكەنەوە و ڕایدەگەیەنن، بەرگری منداڵ بەهێز دەكات و تەندروستی و گەشەیەكی باشی پێ دەبەخشێت.
دكتۆر تیشك محەمەد، پزیشكی پسپۆڕ چەند ڕێنماییەك بە دایكان دەدات تاوەكو شیری خۆیان بدەن بە منداڵەكانیان و دەڵێت: “ڕاستەوخۆ دوای لەدایكبوونی كۆرپەكەت، جگە لەشیری خۆت هیچ شتێكی تری پێ مەدە وەك (ئاو، شەكراو تەنانەت مەمكە وشكەش) مەگەر لەڕووی پزیشكیەوە هۆكارێك هەبێت.
1- بۆ یەكەم شیرپێدان دوای لەدایكبوون پێویستە دەستبەجێ كۆرپەكە بە ڕووتی بخرێتە سەرسنگی دایك (پێستیان بەریەكتر بكەوێت)، تەنانەت پێش ئەوەی كێشانە و پێوانەی سەر و باڵا و دەرزی (ڤیتامین k) بۆ بكرێت.
2- بۆ ئەوەی شیرەكە زۆر و بەردەوام بێت: لەهەر ژەمێكدا پێویستە هەردوو مەمك بدرێت بە منداڵەكە و لەو لایەوە دەست پێ بكرێتەوە كە دووەم جار خواردویەتی لەژەمەكەی پێشوتردا (بۆ نموونە: ئەگەر لەژەمی پێشودا كۆتاجار لای چەپی مژیبێت ئەوا لەژەمی تازەدا لە چەپەوە دەست پێ بكەرەوە).
3- هەرژەمێكی شیرپێدان ۲۰ خولەك زیاتری ناوێت و زۆربەی منداڵ بە ۱۰ خولەك تێرئەبن و تەنانەت هەندێكیان خەویان لێ ئەكەوێت لەدوای مژینی یەك لای مەمك.
4- واباشترە مەمكی لایەك بەتاڵ ببێت پێش پێدانی مەمكی لایەكەی تر.
5- لە نیوەی هەرژەمێكدا (نیوەی مابێت تێربخوات) و دووبارە لەكۆتایی هەمان ژەمدا پێویستە منداڵەكە بەرزبكرێتەوە بۆ شێوازی دانیشتن یان بدرێت بەسەرشانی دایكەكەدا بۆئەوەی ئەوهەوایەی قوتی داوە بێتە دەرەوە لە گەدە (قرقێنە بداتەوە).
