بریندارەكەی هێرشەكەی ئەمڕۆی پارێزگەی مێردینی باكووری كوردستان گیانی لەدەست دا.
شەوی ڕابردوو لە شاری نسێبینی سنووری پارێزگەی مێردینی باكووری كوردستان كەسێك هێرشی كردووەتە سەر ئۆتۆمبێلێك و دەسڕێژی گوللەی لێكردووە، لە ئەنجامی ئەو ڕووداوەشدا چوار كەس كوژراون و كەسێكی دیكەش بریندار بوو، كەمێك لەمەوبەر ئەو بریندارەش گیانی لەدەستدا.
بەپێی زانیارییەكان، قوربانییەكان لە بنەماڵەیەكن و خەڵكی شاری دهۆكی باشووری كوردستانن.
پارێزگاری مێردین لە ڕاگەیەندراوێكدا ئاشكرایكرد، لەسەر هێرشەكەی نسێبین چوار كەسیان دەستگیركردووە و لێكۆڵینەوەیان دەستپێكردووە.
مەسرور بارزانی سەرۆكی حكومەتی هەرێمی كوردستان لەبارەی ڕووداوەكەی سنووری مێردینی باكووری كوردستانەوە پەیامێكی بڵاوكردەوە و ڕایگەیاند“لە كاتێكدا بە توندی ئەم تاوانە سەركۆنە دەكەم، داوا لە حكومەتی توركیا دەكەین كە بە زووترین كات، هۆكارەكانی ئەنجامدانی ئەم تاوانە ڕوون بكەنەوە و تاوانبارانیش ڕووبەڕووی دادگا بكەنەوە”.
لەلایەكی دیكەوە فەرمانگەی پەیوەندییەكانی دەرەوەی هەرێمی كوردستان سەركۆنەی هێرشەكەی مێردینی كرد و ڕایگەیاند، پێویستە تۆمەتبارانی هێرشەكە دادگاییبكرێن و توركیا بەدواداچوون بۆ ڕووداوەكە بكات.
وەزارەتی دەرەوەی عێراقیش ڕایگەیاند، لەگەڵ توركیا لێكۆڵینەوە لە هێرشەكەی مێردین دەكەین.
لە ماوەی ڕابردووشدا چەند جارێك هاووڵاتیانی باشووری كوردستان لە باكووری كوردستان و توركیا ڕووبەڕووی هێرش و پەلامار بوونەتەوە.
