سەردێر

عیراق، لەمەودوا ئەدیبان و نوسەران بەخۆڕایی چارەسەرییان بۆ دەكرێت

خەڵك-
حەسەن تەمیمی وەزیری تەندروستی و ژینگەی عیراق، فەرمان دەكات لەڕێی ناسنامەی سەندیكاوە، ئەدیبان و نوسەران بە خۆڕایی چارەسەرییان بۆ بكرێت.

بەپێی بەیاننامەیەك كە لەلایەن وەزارەتی تەندروستی عیراقەوە بڵاوكرایەوە”حەسەن تەمیمی وەزیری تەندروستی، نوسراوێكی بۆ فەرمانگەی كارگێڕی و دارایی و یاسایی ڕەوانە كردووە و تێیدا فەرمان دەكات، ئەدیبان و نوسەران بەخۆڕایی و لەسەر ئەركی وەزارەت چارەسەر بكرێن، ئەمەش لە چوارچێوەی بایەخ و پشتیوانی وەزارەتی تەندروستییە بۆ كاروانی هونەری و ئەدەبی و میدیایی كە بەردەوام وەزارەتی تەندروستی هەوڵ دەدات خزمەتگوزاریی بەخۆڕاییان بۆ دابین بكات لەكاتی حاڵەتی نەخۆشی و ڕەوشە مرۆییەكان”.

هەر لە بەیاننامەكەدا هاتووە”ڕەزامەندییەكە پشت بە ناسنامەی یەكێتی گشتی ئەدیبان و نوسەرانی عیراق دەبەستێت وەك بەڵگەنامەیەكی فەرمی بۆ چارەسەری خۆڕایی لە هەموو دامەزرازە تەندروستییەكانی سەر بە وەزارەتی تەندروستی”.