سەردێر

لە ڕۆژهەڵاتی كوردستان 9 ژن دەستگیركران

خەڵك- بەشی هەواڵ
لە ماوەی كەمتر لە دوو هەفتەدا ٢٠ ژنی كورد لە شارە جۆراوجۆرەكانی كوردستان دەستبەسەركراون یان بانگهێشتی ناوەندە ئەمنییەكان كراون و لێپرسینەوەیان لەگەڵ ئەنجام دراوە.

ڕێكخراوی مافی مرۆڤی هەنگاو لە ڕاپۆرتێكدا بڵاویكردەوە، لەگەڵ دەستپێكی شەپۆلی نوێی دەستبەسەر كردنی هاووڵاتیانی كورد، كە ٢٠ی بەفرانبار (٩ی كانوونی دووەم) دەستی پێكردووە، لانیكەم ٩ ژنی كورد لە شارەكانی كرماشان، بانه، نەغەدە، بۆكان و مەهاباد لەلایەن ناوەندە ئەمنییەكانی كۆماری ئیسلامی ئێرانەوە دەستبەسەر كراون.

بە پێی ئەو ڕاپۆرتە، “سێ كەس لەو ژنانە بە ناوەكانی (نازەنین ئەتابەكی و نەسرین یەزدانی پوور خەڵكی كرماشان و تەرانە محەمەدی خەڵكی بانە) هەمان ڕۆژی دەستبەسەر كران ئازاد كراون و پێنج ژنی دیكە هێشتا دەستبەسەرن”.

ئاشكراشی كردووە، (دەریان تاڵبانی و ئەسرین محەمەدی خەڵكی مەهاباد و عەزیمە ناسری خەڵكی بۆكان ڕۆژی شەممە ٢٠ی بەفرانبار (٩ی كانوونی دووەم) لە شارەكانی مەهاباد، تاران و بۆكان دەستبەسەر كراون و ئێستا لە دەستبەسەرگەی ئیتلاعاتی سپای ئورمیە ڕاگیراون و پەیوەندی كورتیان لەگەڵ بنەماڵەكانیان كردووە”.

ڕێكخراوی مافی مرۆڤی هەنگاو ئاماژەی بەوەشكردووە، “چارەنووسی گەلاوێژ عەبدوڵڵاهی خەڵكی نەغەدە، فەریبا ئەحمەدی و ڕۆژین محەمەدپوور خەڵكی بۆكان، كە ٢٤ی بەفرانبار و ٣٠ بەفرانبار دەستبەسەر كراون نادیاره”.

هەنگاو زانیویەتی، كە لە ماوەی دوو هەفتەی ڕابردوودا لانیكەم ١١ چالاكی ژن لە شارەكانی كرماشان، مەریوان، بۆكان و مەهاباد لەلایەن ناوەندە ئەمنییەكانی كۆماری ئیسلامی ئێرانەوە بانگ كراون و لێپرسینەوەیان لەگەڵ كراوە.

ناوی ئەو كەسانەی، كە دەستنبەسەر كراون:
١_ دەریا تاڵبانی خەڵكی مەهاباد ڕێكەوتی ٢٠ی بەفرانبار لە مەهاباد دەستبەسەر كرا.
٢_ ئەسری محەمەدی خەڵكی مەهاباد ڕێكەوتی ٢٠ی بەفرانبار لە مەهاباد دەستبەسەر كرا.
٣_ عەزیمە ناسری خەڵكی بۆكان ڕێكەوتی ٢٠ی بەفرانبار لە بۆكان دەستبەسەر كرا.
٤_ تەرانە محەمەدی خەڵكی بانه ڕێكەوتی ٢٢ی بەفرانبار لە بانه دەستبەسەر كرا.
٥_ گەلاوێژ عەبدوڵلاهی خەڵكی نەغەدە ڕێكەوتی ٢٤ی بەفرانبار لە نەغەدە دەستبەسەر كرا.
٦_ نازەنین ئەتابەكی خەڵكی كرماشان ڕێكەوتی ٢٧ی بەفرانبار لە كرماشان دەستبەسەر كرا.
٧_ نەسرین یەزدانی پوور خەڵكی كرماشان ڕێكەوتی ٢٧ی بەفرانبار لە كرماشان دەستبەسەر كرا.
٨_ فەریبا ئەحمەدی خەڵكی بۆكان ڕێكەوتی ٣٠ی بەفرانبار لە بۆكان دەستبەسەر كرا.
٩_ فەریبا ئەحمەدی خەڵكی بۆكان ڕێكەوتی ٣٠ی بەفرانبار لە بۆكان دەستبەسەر كرا.