سەردێر

چنار و هێمن، ڕۆشتن بۆ قوتابخانەو ئیدی نەگەڕانەوە … چیرۆکەکەیان بخوێنەرەوە

چنار و هێمن ئه‌و خوشك و برا قوتابییه‌ بوون كه‌ ساڵی 1992 له‌ شاری سه‌یدسادق بەهۆی  به‌فر و سه‌رماوە گیانیان لەدەستدا.

چنار ناسیح و هێمن ناسیح دوو منداڵی بێ باوك بوون، باوكیان ئه‌نفال كراوبوو، پاش كۆڕه‌كه‌ی ساڵی 1991 له‌ كه‌لاوه‌كانی ئۆردووگای شانه‌ده‌ری نزیك شاری سه‌یدسادق نیشته‌جێ بوون، ئه‌و دوو منداڵه‌ له‌ شاری سه‌یدسادق قوتابی بوون و هه‌موو به‌یانییه‌ك له‌ ئۆردووگای شانده‌رییه‌وه‌ به‌ پێ ده‌ڕۆشتن بۆ سه‌یدسادق.

ساڵی 1992 به‌فرێكی زۆر باریی بوو شاره‌زووریش سپی پۆش بووبوو. رۆژی 7/1/1992 چنار و هێمن رۆشتن بۆ قوتابخانه‌ و ئیتر نه‌گه‌ڕانه‌وه‌ بۆ ماڵه‌وه‌.
كاتێك دایكی هاواری كرد كه‌ منداڵه‌كانی نه‌هاتوونه‌ته‌وه‌ خه‌ڵكی سه‌یدسادق ده‌ستیان كرد به‌ گه‌ڕان به‌ دوای ئه‌و دوو منداڵه‌دا، سه‌رئه‌نجام له‌ سه‌رووی سه‌یدسادقه‌وه‌ له‌ژێر به‌فره‌وه‌ جه‌سته‌ی ته‌زیوی هه‌ردووكیان دۆزرانەوە كه‌ بۆ ماڵه‌وه‌ رۆشتبوونه‌وه‌ و به‌فر و سه‌رما كه‌سیره‌ی خستبوون.

 

هێمن له‌ چنار منداڵ تر بوو زووتر په‌كی كه‌وتبوو چناریش (هه‌ر به‌و شێوه‌یه‌ی په‌یكه‌ره‌كه‌یان) خۆی دابوو به‌سه‌ر جه‌سته‌ی ته‌زیوی برا بچووكه‌ بێ باوكه‌كه‌یدا تا سه‌رما نه‌یكوژێت، به‌ڵام كاتیك دۆزرانه‌وه‌ هێمن گیانی سپاردبوو چناریش له‌ كۆتایی ژیانیدا بوو، هاووڵاتیان به‌په‌له‌ گواستیانه‌وه‌ بۆ نه‌خۆشخانه‌ به‌ڵام ئه‌ویش لە نەخۆشخانە گیانی سپارد.

ئێستا له‌ ده‌روازه‌ی سه‌یدسادق په‌یكه‌رێك بۆ ئه‌و دوو  منداڵە  دروستكراوه‌ و وه‌ك ره‌مزێك بۆ شاری سه‌یدسادق ماونه‌ته‌وه‌، ساڵانه‌ش له‌ سه‌یدسادق مه‌راسیم بۆ ئه‌و دوو قوربانییه‌ ده‌كرێته‌وه‌ و خه‌ڵكی شاره‌كه‌ به‌ حه‌سره‌ته‌وه‌ یادی ئه‌و كاره‌ساته‌ جه‌رگبڕه‌ ده‌كه‌نه‌وه‌. وه‌ك رێزێك له‌ رۆحی ئه‌و دوو منداڵەش، له‌ شاری سه‌یدسادق قوتابخانه‌یه‌ك به‌ ناوی چنار و باخچه‌یه‌كی ساوایان به‌ ناوی هێمن كراونه‌ته‌وه‌.

 

هونەرمەند زاهیر سدیق کە لە شاری سه‌یدسادق پەیکەری بۆ ئەو دوو منداڵە درووستکردوە لە بارەی کارەکەیەوە دەڵێت”ئه‌م په‌یكه‌ره‌ له‌ دژوارترین ڕۆژگاری كوردستان له‌ سه‌ر ئه‌رك و خه‌رجی خۆمان دروست كرا، ئه‌میستا هیوا خوازین ئه‌م كاره‌ بکرێتە برۆنز و نۆژه‌ن بكریتەوە”