هەندێک پیاو ڕەزیلن و بە ئاسانی پارە خەرج ناکەن، ئەمەی خوارەوە کۆمەڵێک تاکتیکە بۆ مامەڵە لەگەڵ ئەو جۆرە پیاوانە:
چۆن پارە بە مێردە ڕەزیلەکەت خەرج دەکەیت؟
سەردێر
-
چاودێرێكی سیاسی دەڵێت:"هەمواری یاسای هەڵبژاردنی ئەنجومەنی نوێنەرانی عیراق تەنیا لە بەرژەوەندیی پارتی و یەكێتیدایە". عارف قوربانی نووسەر و چاودێری سیاسی لە نووسینێكیدا ئاماژە بەوەدەكات:"یاسای هەڵبژاردنی ئەنجومەنی نوێنەرانی عیراق بەجۆرێك هەموار كرایەوە كە لە بەرژەوەندیی كوتلە گەورەكان بێت، دوور نییە دوای هەڵبژاردن كەشێكی سیاسی بێنێتە ئاراوە كۆتایی بەو فرە رەنگییە لە فراكسیۆنی جیاجیای پەرلەمانی بهێنێت و پەرلەمان بەسەر چەند هاوپەیمانێتییەكی گەورەدا دابەش بكات، چونكە یاساكە بواری ئەوەی بۆ حیزبە بچووكەكان نەهێشتووەتەوە بە ئاسانی بگەنە پەرلەمان، هەروەها ئەو حیزبانەش كە دەنگەكانی زۆر پەرت و بڵاون بەهۆی فرە بازنەیی لە هەڵبژاردندا دەرفەتی ئەوە نەماوە دەنگەكان بۆ یەك بازنە كۆبكرێتەوە، بەو هۆیەشەوە ئەو حیزبانەی نفوزیان لە ناوچەی دوورلەیەك و پەرت و بڵاوە، ئەوانیش شانسی بەدەستهێنانی كورسییان نەماوە". لەبەشێكی تری نووسینەكەیدا عارف قوربانی ئەوەی خستووەتەڕوو:"بە كورتی و كوردییەكەی، یاساكە بۆ موجامەلەی كوتلە بەهێزەكانی عیراق هەموار كرایەوە و لە كوردستانیش بەدڵی پارتی و یەكێتی. لە ڕووی كۆمەڵایەتیشەوە كۆمەڵگەی عیراق و كوردستان بەرەو خێڵگەری ئاراستە دەكات، چونكە حیزبەكان ناچار دەكات بۆ كۆكردنەوەی دەنگ لە بازنەیەكی دیاریكراو، كوڕ و كەسوكاری سەرۆك خێڵ و هۆز و عەشیرەتەكان بەربژێر بكەن. ئەمەش عیراق و پەرلەمانەكەی بەرەو ئەنجوومەنی هۆزەكان دەبات نەك دامەزراوەیەك بۆ خزمەتی برەودان بە دیموكراسی. ئەوانەی عەڕابی ئەم شێوازە لە هەمواری یاسای هەڵبژاردن بوون و ئەندازیاری ئەو دیزاینەی نەخشەی داهاتووی پەرلەمانی عیراق بوون، شاراوە نییە بەچی مەبەستێك ئەوەیانكرد، بەڵام گەلانی عیراق لە داهاتوودا باجەكەی دەدەنەوە". هەروەها نووسەر و چاودێرە سیاسییەكە ئاماژەی بەوەش كردووە:"یاساكە هەر كاریگەریی لەسەر هێز و كوتلە سیاسییەكانی عیراق نییە، بەڵكو ڕەنگدانەوەی لەسەر پڕۆسەی سیاسیی كوردستانیش دەبێت، ئەگەر بگەڕێینەوە بۆ ڕۆژانی پەسندكردنی هەمواری یاساكە لە پەرلەمانی عیراق و هەڵوێستی لایەنە كوردستانییەكانی بەشدار لە پەرلەمان بهێنینەوە یادی خۆمان، دیمەنەكان جوانتر دەبینین كە ئەوكات گۆڕان، یەكگرتوو و كۆمەڵ و نەوەی نوێ و ئەو پەرلەمانتارانەی لەوانیش جیا ببوونەوە، هەمویان لە دژی هەمواری یاساكە بوون و ناڵەیان گەیشتبووە ئاسمان كە ئەم یاسایە پێشێلكردنی دیموكراسییە و بواری هاوبەشی سیاسی بۆ هێزە بچووكەكان ناهێڵێتەوە، تەنانەت ڕوونتر دەیانگووت ئەمە بۆ موجامەلەی پارتی و یەكێتیی و بە ئیتیفاقی نهێنی ئەوان كراوە و لەمەودوا هەموو كورسییەكانی پەرلەمانی عیراق لە كوردستان پارتی و یەكێتی دەیبەن". ئەو نووسەر و چاودێرە سیاسییە ڕوونیشی كردووەتەوە:"بێگومان ئەو قسەیە ڕاستە كە هەمواری یاساكە تەنیا لە بەرژەوەندیی پارتی و یەكێتیدایە و لە باشترین دۆخدا ئەگەری ئەوە هەیە یەكگرتوو، كۆمەڵ، گۆڕان و نەوەی نوێ هەر یەكی یەك كورسی ببەن، ئەوەش وەك ئەگەرێكی لاواز. دروستبوونی هاوپەیمانێتیی هیوا و هەموو ئەو ئەگەرانەش بۆ دروستبوونی بەرەیەكی فراوان لەنێوان ئەو حیزبانەی دەرەوەی پارتی و یەكێتی، هێشتا دڵنیایی ئەوەی نییە كە بتوانرێت كورسییەكان لە پارتی و یەكێتیی وەرگرن، چونكە یاساكە بەو جۆرە هەموار كرایەوە و بازنەكان بەدڵ و بەپێی قورسایی و دەنگی پارتی و یەكێتی و بە هاوئاهەنگیی لەگەڵ ژووری هەڵبژاردنی ئەو دوو حیزبە دروستكران، بۆیە هەرچەندە ئێستا هاوكێشەكانیش گۆڕاون و پەیوەندییە سیاسییەكان پێچەوانەی ئەو كاتەیە كە یاساكەی تیا هەمواركرایەوە، بەڵام تازە زەمەن ناگەڕێتەوە و دەرفەتی هەموارێكی دیكەی یاساكە نەماوە. ئەوەی روونە ئەوەیە كە ئەو شەست كورسییەی خولی داهاتووی پەرلەمان، لیستەكانی یەكێتی و پارتی دەیبەن. عارف قوربانی زیاتر ڕوونی كردووەتەوە و دەڵێت:"ئەگەر پارتی و یەكێتی هەر یەكە و لیستی سەربەخۆی خۆی هەبێت و كەسیتر نەكەنە هاوبەشی خۆیان، هەموو كورسییەكان بۆ ئەو دوو حیزبە دەبێت. با گریمانەی ئەوە بكەین هەر یەكی…
-
ئاشنا فەلاح، بەڕێوەبەری پەیمانگای ئاشنا لە سلێمانی و فەرمانبەر لەبەشی كارگێڕی زانکۆ دانبەوەدا دەنێت کە لە پۆلی دووەمی ناوەندییەوە تا پاش زانکۆ بە قۆپیە دەرچووە و وەک خۆشی دەڵێت هەموو جۆرە قۆپییەكی کردووە. ئەم وتانەی ئاشنا فەلاح لە تۆڕە کۆمەڵایەتیەکان ناڕەزایی لێکەوتۆتەوە و داوادەکەن کە ڕێکاری یاسایی بەرامبەر بگیرێتە بەر و داواکاری گشتی و وەزارەتی پەروەردە و خوێندنی باڵا لەسەر ئەو بابەتە هەڵوێستیان هەبێت. بەڵام ئاشنا فەلاح بۆخۆی لەبارەی ئەو قسانەوە ڕایگەیاندووە کە ئەو تەنها ڕاستی وتووە و هەمووان قۆپیان کردووە، بەڵام ئەوان هەموان من ڕاستیەکە ناڵێن و خەڵکیش نایانەوێت گوێیان لە ڕاستی بێت" ئاشنا وتوشیەتی"من ماممۆستای زانکۆ نیم و تەنها فەرمانبەرم، پەیمانگاکەشم ئەهلیە و بۆخۆم دامەزراندووە و هیچ کەسێک هاوکاری نەکردووم و ئەو هەڵمەتەش کە درووستکراوە تەنها بۆ لێدانی منە" https://www.youtube.com/watch?v=F7rKlu3_mA0&feature=emb_title
-
باڵیۆزی ئێران كۆماری ئیسلامی لە عیراق ڕایدەگەیەنێت: هەڕەشەكانی توركیا لە هێرشكردنە سەر شنگال ڕەتدەكەنەوە و دەبێت توركیا خاكی عیراق بەجێبهێڵێت. ئیرەج مەسجدی باڵیۆزی كۆماری ئیسلامی ئێران لە عیراق لە چاوپێكەوتنێكیدا لەگەڵ كەناڵی ڕووداو ڕایگەیاند:"پەیوەندییەكانیان لەگەڵ هەرێمی كوردستان زۆر گەرمن، هەروەها وتیشی حكومەتی ئێران دژی ئەو دوو فیلمە بوو كە لەسەر هێرشەكانی داعش بۆ سەر هەولێر بەرهەمهێندرابوون و بوونە هۆی تووڕەبوونی سەركردایەتی لە هەرێمی كوردستان". ئیرەج مەسجدی ڕوونیشیكردەوە، ئەوان دژی هەبوونی هەموو هێزێكی سەربازیی بیانین لە عیراق و هەرێمی كوردستان، هەر لەو چوارچێوەیەشدا هەڕەشەكانی توركیا لە هێرشكردنە سەر شنگال ڕەتدەكەنەوە و دەبێت توركیا خاكی عێراق بەجێبهێڵێت و هێزەكانی بگەڕێنەوە سنوورە نێودەوڵەتییەكان. باڵیۆزی كۆماری ئیسلامی ئێران لە عیراق ئەوەشی خستەڕوو، ئەوان دژی هێرشكردنە سەر هەولێر و هەموو نوێنەرایەتییە دیپلۆماسییەكانن لە عیراق. خەڵك – بەشی هەواڵ
-
وەزارەتی دەرەوەی سعودیە بە تەواوەتی ڕاپۆرتەكەی ئەمریكای لەبارەی كوشتنی جەمال خاشقچی ڕۆژنامەوان ڕەتكردەوە. وەزارەتی دەرەوەی سعودیە لە ڕاگەیەنراوێكدا ئەوەی خستەڕوو، چاودێری ئەو ڕاپۆرتە دەكەن لەبارەی كوشتنی خاشقچییەوە پێشكەشی كۆنگرێسی ئەمریكا كراوە و تیایدا هاتووە:"بەهیچ جۆرێك ئەو ڕاپۆرتە قبوڵ ناكەین كە تۆمەتی بێبنەما و سووكایەتی تیادایە بەرامبەر ئیدارەی سعودیە و ڕاپۆرتەكەی ئەمریكا چەندین زانیاری و ئەنجامی ناڕاستی تیادایە". وەزارەتی دەرەوەی سعودیە تیشكی خستووەتە سەر ئەوەی، پێشتریش لەلایەن، لایەنە پەیوەندیدارەكانی سعودیەوە ئیدانەی كوشتنی خاشقچییان كردووە كە ئەمە دژی یاسا و بەهاكانی سعودیەیە و داكۆكی لەوە كردووە كە ئەوانەی ئەم كارەیان ئەنجام داوە سنووری دەسەڵاتی خۆیان بەزاندووە و لەلایەن كەسانێكەوە ئەمە ئەنجام دراوە كە تەواوی سیستمی سعودیەیان بەزاندووە. لە ڕاگەیەندراوەكەدا باس لەوەش كراوە، كە بۆ لێكۆڵینەوە لە كوشتنی خاشقچی و ڕادەستكردنی بەرپرسیارانی ئەم ڕووداوە تەواوی هەنگاوە پێویستییەكانیان ناوە، دەسەڵاتی دادوەریش لەبارەی ئەنجامدەرانەوە بڕیاری كۆتایی داوە و خانەوادەی خاشقچیش بە خۆشحاڵییەوە پێشوازییان لەو بڕیارە كردووە. وەزارەتی دەرەوەی سعودیە بە تیشك خستنە سەر ئەوەی كە هاوبەشیەتی نێوان سعودیە و ئەمریكا بەهێزە، هیوای خواستووە ئەم پەیوەندییانە لە سەر بنەمای ڕێزی هاوبەش كە 80 ساڵە بەم جۆرەیە، بەردەوام بن. جێی ئاماژەیە، بەپێی ئەو ڕاپۆرتەی دەزگای هەواڵگریی ئەمریكا ئامادەی كردووە، دەركەوتووە شازادەی جێنشینی سعودیە، محەمەد بن سەلمان ڕەزامەندی دەربڕیوە بۆ كوشتنی جەمال خاشقچی ڕۆژنامەوان لەناو كونسوڵخانەی سعودیە لە ئیستانبوڵ. خەڵك – بەشی هەواڵ
-
سەرەڕای بڵاوبوونەوەی ڤایرۆسی كۆرۆنا داهاتی باجەكانی عیراق لە ساڵی 2020دا نزیكەی 4 ترلیۆن دینار بووە و داهاتی ئەو باجانەش بە بەراورد بەساڵی ڕابردوو زیادیكردووە. شاكر مەحمود بەڕێوەبەری گشتی دەستەی گشتی باجەكانی عیراق ڕایگەیاند، داهاتی باجەكان لە ساڵی 2020دا زیاتر لە 3 ترلیۆن و 800 ملیۆن دینار بووە، كە ئەمەش بەراورد بە ساڵی 2019 بە ڕێژەی 23% زیاترە. زیادبوونی ڕێژەی داهاتی باجەكانیش لە كاتێكدایە، عیراق لەساڵی ڕابردوودا بەهۆی بڵاوبوونەوەی ڤایرۆسی كۆرۆناوە بە ئاستێكی زۆر چالاكییە ئابوورییەكانی وەستابوون. خەڵك – بەشی هەواڵ
-
خەڵک پاش بڵاوبوونەوەی تۆمارێکی ڤیدیۆیی بەشێک لە بەرنامەیەکی کات بەسەر بردن لە یەکێك لە کەناڵەکانی هەرێمی کوردستان لە نێو تۆڕە کۆمەڵایەتییەکان، کە تێیدا کەسێک باس لە ئەنجامدانی قۆپی و ڕێگەکانی ساختەکاری لە وانەکانی خوێندندا دەکات ڕێکخراوێکی قوتابیان، لە راگەیەنراوێکدا داوای گرتنەبەری رێکاریی یاسایی دژ بەو کەسە دەکات. دەقی ڕاگەیەنراوەکە بەناوی خوای گەورە و میهرەبان بۆ بەڕێزان: داواکاری گشتی هەرێم وەزارەتە پەیوەندیدارەکانی حکومەتی هەرێم لەم ڕۆژانەدا و لەکەناڵێکی ڕێگەپێدراوی تەلەفزیۆنییەوە، لەبەرنامەیەکی تەرفیهی و کات بەسەر بردندا، کەسێک کەخۆی وەک مامۆستای زانکۆ و بەڕێوەبەری پەیمانگایەکی ئەهلی دەناسێنێت، بەشێوەیەکی ڕوون و بەشانازییەوە باس لەوە دەکات کە لەپۆلی دووی ناوەندییەوە بە قۆپی و گزیکردن دەرچووە، هاوکات وردەکاری و شێوازەکانی قۆپیکردنیشی دەخاتەڕوو. لە چەقی قەیرانە پەروەردەییەکاندا و لەم دۆخە ناهەموارەی کەرتی پەروەردە و خوێندندا، بڵاوکردنەوەی ئەم جۆرە بابەتانە و ڕەواجپێدانی، تاوانێکی ئاشکرایە و کاریگەریی خراپ لەسەر بیر و بۆچوون و دەروونی قوتابیان و خوێندکاران جێدەهێڵێت، هەروەها حەزی زانست و ویستی هەوڵ و کۆششکردن بۆ فێربوون بەلاڕێدا دەبات، ئەمە بەدەر لەوەی بە ئاشکرا قوتابیان بۆ پەنا بردنە بەر ڕێگای هەڵە و گزیکردن هان دەدات. ئێمە لە ڕێکخراوی قوتابیانی کوردستان بەپێویستی دەزانین، لەپێناو دووبارە نەبوونەوەی ئەم جۆرە هەڵە زەقانەدا داواکاری گشتی لەهەرێم بەدواداچوون بۆ بابەتەکە بکات و ڕێکاری پێویست بگرێتە بەر، هاوکات داواکارین لە هەرکام لەوەزارەتەکانی (پەروەردە و خوێندنی باڵا و وەزارەتی ڕۆشنبیری) بە ئەرکی سەرشانی خۆیان هەستن و ڕێوشوێنی یاسایی بەرامبەر کەسەکە و ئەو دەزگا ڕاگەیاندنەش بگرنەبەر. ڕێکخراوی قوتابیانی کوردستان مەکتەبی سکرتاریەت ٢٧ شوباتی ٢٠٢١
-
خەڵك-بەشی هەواڵ سەركونسوڵی كۆماری ئیسلامی ئێران لە سلێمانی ڕایگەیاندووە دووەمین پێشانگای تایبەتی كۆماری ئیسلامی ئێران لە سلێمانی لە مانگی ئایاری ئەمساڵ بەڕێوەدەچێت. مەهدی شوشتەری سەركونسوڵی كۆماری ئیسلامی ئێران لە سلێمانی رایگەیاند ، دووەمین پێشانگای تایبەتی كۆماری ئیسلامی ئێران لە سلێمانی بەپێی مۆڵەتی دەستەی پەرەپێدانی بازرگانی ئێران لە 25 تاكو 29ی ئایاری 2021 ی زاینی لە ناوەندی پێشانگای نێودەوڵەتی سلێمانی بەڕێوەدەچێت. سەركونسوڵی كۆماری ئیسلامی ئێران وتیشی، خواستی بازرگانان و بەكارهێنەرانی هەرێمی كوردستانی عێراق بۆ كاڵا و بەرهەمە ئێرانیەكان زۆرە. شوشتەری ئاماژەی بەوەشكرد كە كۆمپانیای پێشانگا هەمیشەییە نێودەوڵەتیەكانی باشوری ئازەربایجانی ڕۆژئاوایی جێبەجێكاری ئەم پێشانگایە دەبێت و خوازیاران دەتوانن بەمەبەستی تۆماركردنی ناو بۆ بەشداری كردن لەم پێشانگایەدا، پەیوەندی بە كۆمپانیای ناوبراوەوە بكەن.
-
ئەمڕۆ شەممە ٢٧ی شوباتی ٢٠٢١ لە ڕێوڕەسمێكدا ڕێبەری یاسایی وەبەرهێنەر ناساندنی بۆكرا كە یەكێتی وەبەرهێنەران سپۆنسەری ئامادەكردنەكەی گرتووەتە ئەستۆ. هاوكات، سەرۆكی لقی سلێمانی یەكێتی وەبەرهێنەران ڕایدەگەیەنێت، دەبوایە زۆر پێشتر ڕێبەرێكی ئاوا لەبەردەمی وەبەرهێنەران بوایە بەتایبەت وەبەرهێنەری بیانی، جەختیش دەكاتەوە ئەگەر هەڵسەنگاندن بكرێت بۆ وەبەرهێنەر قەبارەی وەبەرهێنان لە ٦٠ ملیار دۆلار بۆ ١٠٠ ملیار دۆلار بەرز دەبێتەوە و هەلی كار زۆرباش دەبێت. یاسین مەحمود، سەرۆكی لقی سلێمانی یەكێتی وەبەرهێنەران بە (تۆڕی میدیایی خەڵك)ی ڕاگەیاند، ڕێبەری یاسایی وەبەرهێنەر كە لەلایەن سێ پارێزەر ئامادەكراوە زۆر گرنگە بۆ داهاتوومان، دەبوایە زۆر پێشتر ڕێبەرێكی ئاوا لەبەردەمی وەبەرهێنەران بوایە بەتایبەت وەبەرهێنەری بیانی، بۆیە وەكو یەكێتی وەبەرهێنەران سپۆنسەری كتێبەكەمان كردووە دەزانین چەند گرنگە، هیودارین لەداهاتوو ڕێبەری یاسایی وەبەرهێنان دەربچێت، چونكە وەبەرهێنەر و وەبەرهێنان گرنگن بەیەكەوە. دەشڵێت، لە هەرێمی كوردستان كێشەمان ئەوەیە تەنها هەڵسەنگاندن بۆ پڕۆژەی وەبەرهێنان دەكرێت، هیچ هەڵسەنگاندنێك بۆ وەبەرهێنەر ناكرێت، لەكاتێكدا لەوڵاتان فۆڕمی وەبەرهێنەر لەپێشترە لە پڕۆژە كە توانای ئابووری چییە و كام بانك و كۆمپانیای بیمە پشتیوانی لێ دەكات، بۆیە ڕێبەرەكە پشتیوان دەبێت لەداهاتوو بۆ ڕزگاربوون لەهەندێ وەبەرهێنەری خراپ و ئەوانەی پڕۆژەی خراپ دروست دەكەن و دەبنە بەڵا بەسەر حكومەت و هاووڵاتی، لەڕابردووش هەندێ وەبەرهێنەر بەهۆی جێهێشتنی پڕۆژە و خواردنی پارەی خەڵك كێشەی گەورەیان جێهێشتووە، وەبەهێنەر هەیە لەكابینەی شەش تائێستا كێشەكەی چارەسەر نەكراوە. یاسین مەحمود ئەوەشی خستەڕوو، لەكارنامەی حكومەتیش دەركەوتووە كە دەیەوێت پشت بەوەبەرهێنان ببەستێت و ماوەی حەوت ساڵیشە بەهۆی قەیرانەكانەوە هەرێمی كوردستان پاشەكشەی گەورەی هەبووە لەوەبەرهێنان، هەزاران دەرچووی پەیمانگا و زانكۆ شوێن نییە كاری تێدابكەن، هەرچەند گرنگی بەوەبەرهێنان بدرێت كەمە، پێویستە پەرتوكەكەش گشتاندنی پێ بكرێت بۆ هەموو وەزارەتەكان بەفۆڕمێكی واقعی پڕۆژە بدرێت بەوەبەرهێنەر و لەبەڵای وەبەرهێنەری خراپ بەدووربین، تاوەكو هەرێمی كوردستان پشت بەژێرخانی ئابووری وسەرچاوە مرۆیی و سرووشتیەكان ببەستێت، چونكە وڵاتەكەمان دەتوانێت لە هەموو سێكتەرەكەی وەبەرهێنەری كاری تێدا بكرێت. سەرۆكی لقی سلێمانی یەكێتی وەبەرهێنەران باسی لەوەشكرد، ئەگەر هەڵسەنگاندن بكرێت بۆ وەبەرهێنەر قەبارەی وەبەرهێنان لە ٦٠ ملیار دۆلار بۆ ١٠٠ ملیار دۆلار بەرز دەبێتەوە و هەلی كار زۆرباش دەبێت، بەتایبەت وڵاتانی دراوسێ و عیراقیش كێشەیان هەیە نابێت هەلی وەبەرهێنان لەدەست بدەین. ڕێبەری یاسای وەبەرهێنەر لەلایەن پارێزەران د.محەمەد سدیق، د.هاوڕێ كەمال و د. لوقمان حەسەن بە زمانەكانی كوردی و عەرەبی و ئینگلیزی ئامادەكراوە. خەڵك - ئارام سەردار
-
خەڵك-بەشی هەواڵ بەرێوەبەرایەتی پەروەردەی سەیدسادق فۆڕمی وانەبێژی بۆ دەرچوانی وانەی بیركاری دەخاتەڕوو. لە ئاگاداریەكی بەڕێوەبەرایەتی پەروەردەی سەیدسادقدا هاتووە، دەرچووانی وانەی بیركاری كۆلێژی پەروەردە و كۆلیژی زانست ئاگادار دەكەینەوە، ئەوانەی فۆڕمی وانەبێژی یەدەگی ساڵانی ڕابردوویان نەماوە، لە ڕۆژی( یەك شەممە) لە ڕێكەوتی (۲۰۲١/٢/٢٨) كاتژمێر (٩:٣٠ تا ١٢:٣٠) سەردانی هۆبەی خۆیەتی و میلاك لە دیوانی پەروەردەی سەیدسادق بكەن، بەمەبەستی پڕكردنەوەی فۆڕمی وانەبێژی. لە ئاگاداریەكەدا مەرجەكانی ئارەزوومەندی پڕكردنەوەی فۆڕمی وانەبێژی خراوەتەڕوو، كە پێویستە كارتی زانیاری سیدسادقی پێ بێت و دانیشتووی قەزاكەبێت، هەروەها دەبێ پشتگیری دەرچوونی بەشەكەی ئامادەبكات لەكاتی گەڕاندنەوەی فۆڕمەكە، یان لە هەفتەی داهاتوودا. ئەوەش هاتووە، جگە لە دەرچووانی ئەو بەشانە، لە ئێستادا فۆڕم بەهیچ بەشێكیتر نادرێت لەبەرئەوەی بەشەكانی تر فۆڕمی ساڵی پاریان ماوە.
-
خەڵک دوایین سەرۆکی یەکێتی سۆڤیەت، داوا لە ڤلادیمیر پۆتینی سەرۆکی ڕووسیا و جۆ بایدنی سەرۆکی ئەمریکا دەکات، کۆببنەوە و سەبارەت بە کەمکردنەوەی مەترسییەکانی هەڵگیرسانی شەڕی ناوەکی دڵنیایی بدەن. میخایل گۆرباتشۆڤ، دواین سەرۆکی یەکێتی سۆڤیەت، ڕۆژی شەممە بە ئاژانسی ئینتەرفاکسی ڕووسی وت: ئەزموون دەریخستووە کە پێویستە چاوپێکەوتن و دانوستان لە نێوان وڵاتاندا هەبێت بۆ چارەسەری کێشەکانیان، گرنگتر لەچاوپێکەوتنیش ئەوەیە کە دەستبەرداری ڕق و کینە ببین. گۆرباتشۆڤ، وتوویەتی؛ ئەولەویەت ئەوەیە کە بەر بەشەڕی ناوەکی بگیرێت بۆ خۆلادان لەم شەڕە نەگریسەش ئەستەمە کە تاکلایەنە چارەسەر هەبێت، بۆیە دەبێت کۆبینەوە و هەمووشمان گرنگی بەم لایەنە بدەین. گۆرباتشۆڤ، ئەزموونی خۆی لە پەیوەندیکردن لەگەڵ ڕۆناڵد ڕیگانی سەرۆکی پێشووتری ئەمریکا بە بیرهێنایەوە کە چۆن کۆبوونەتەوە و درکیان بە مەترسییەکانی هەڵگیرسانی جەنگ کردووە و چۆن ڕێچارەیان داناوە بۆ چارەسەرکردن. دوایین سەرۆکی یەکێتی سۆڤیەت، لە مانگی کانوونی دووەمدا پیشنیاری بۆ ڕووسیا کردبوو، پێشنیاز بخاتە بەردەم ئەمەریکا لەسەر ئاستی باڵا کۆببنەوە، بۆ واژۆکردنی ڕاگەیەنراوێک کە پشتڕاستی ڕەتکردنەوەی شەڕی ناوەکی نێوانیان بکاتەوە .
