سەردێر

سەرۆکی کۆماری دەوڵەتە نەخۆشەکە!!

سالاری بازیان
دەوڵەت کە بۆتە شێرپەنجەی گەلانی ڕۆژهەڵاتی ناوین و ڕەمزی ستەم و چەوساندنەوە و لەناوبردنی نەژاد و ئایین و ئایینزاکانی تر لەپێناو پاراستنی بەناو ئاسایشی دەوڵەتدا ئازادی لەناو دەبەن و قەڵاچۆی دەنگ و ڕەنگە جیاوازییەکان و هاوزمانەکانیان دەکەن و سندوقى ميوه لەگەڵ سندوقی دەنگدان لەپراکتیزیه وەک یەک سەیری دەکەن !!

دەوڵەتی عێراق لە ئێستادا کەوتونەته گیانی بەناوی جیاواز ژێر زەوی و سەرزەوی بەتاڵان دەبەن ڕووتێنراوەتەوە بنکۆڵ و کرمۆڵکراوە، پایتەختەکەی جادە و شەقام و باڵاخانە و ماڵی سیاسی و حیزبە جیاوازییەکان و دام ودەزگا دەوڵەتییەکانیشیان هەر میراتی بەجێماوی (سەدام حسێن)ە، لەگەڵ هەر کەسێک گفتوگۆ بکەیت، پێت دەڵێن ئەمانە تاڵانیانکردوە، ئەوەی هەیە و نییە هەر هی زەمانی سەرۆکی لەدار دراوە، بەڵام دواجار دەوڵەت ناڕوخێت و لەناوناچێت و زایە نابێت، ئەوەی تەواودەبێت و دەڕوات حکومەت و دەسەڵاتە جیاوازکانە.

کوردستانی بێ دەوڵەت و خاوەنی کەسایەتی نێودەوڵەتی( کامل ئەهلییە) نییە هەرکاتێ باهۆز یان ڕەشەبایەک لەلابەلاوە هەڵبکات، دەتوانێت بەئاسانی عەرش و کۆشکی ئەم دەسەڵاتە بکاتە کەلاوە…. (هۆبز) وتەنی لیڤاثیانەکەی بەغداد بێتەوە هۆش و سەرپێی خۆی بەیەک قەپاڵ قوتی دەدات، واتا ئێمەی بێ کورسی و بێ ناونیشان لە نەتەوە یەکگرتوەکان دروست وایە بڵێین ڕێکخراوی دەوڵەتە یەکگرتوەکان، هەر چەندە بەدیوێکی تردا نیگا بکەی زۆرن ئەو ڕێبەرانەی کەڕابەری دەوڵەتی نەتەوەی خۆشیان بوون، غروور و بێباکی سەری بەتاڵانبردوون و کۆتا وێستگەی حکومڕانییان زۆر خەندەدار ون بوون فەخفەخەو لاف و گزاف و بروبیانوو بووە بە میراتی فەرهەنگی و جێگەی تێڕامانی گەڕیدە مێژووییەکانە.

(عەبدوڵا ئۆچ ئالان) “دەڵێت: زۆربەی سەرکردەکانی ڕۆژهەڵاتی ناوین لەو ڕاهێنەرە ئیسپانییە دەچن کە پەڕۆسورەکەی گرتووە بۆ گا هارە، پەڕۆکە فرێبدا یان بەشاخەکانی دەیکوژێت، یان لەبیمارستان دەمرن، یان دەنێرێنە زیندان”

نازانم سەرۆک حیزبەکانی باشوور ئەو هەموو یارییە خۆکوژی و بێباکییە لەچ ئایندەبینێکەوە دێنن؟
دوای (30) ساڵ حکومداری میراتی چەندین سەدە خوێن و خەبات، ماڵی کورد لە هەمو سات شێواوتر و درزی نێوان کۆمەڵگا و حیزبی سیاسی ئەمەندە لێکترازاوە نەگرێدەدرێتەوە و نەپینە دەکرێت.

قەیرانەکان ڕۆژ بە ڕۆژ زیاتر سەنگ و قورسایی هەرێم لاوازتر و بێبایەخ تر دەکەن بەئاشکرا و ئاگاهی وڵاتان لەنێوان ئەو دوو ئەمارەتەدا تەراتێن دەکەن هەژمونگەرا و ڕووپێوی بەرژەوەندییەکانی خۆیان دەکەن و لەکۆتاجاریشدا قازانج سەری مایە دەخوات و دەبێت شعری شاعیران کە عەیامێکە دەردی خۆخۆرییان کردۆتە وێردی سەر زمانیان، نەوەکانی داهاتوو بەحەسرەتەوە بەئاواز و شێوازی سەردەمییانە بیڵێنەوە.

شایەد ئەم خوێندنەوەیە ڕەشبینانە بێت، وەلێ جێگەی داخە چی پێشبنیی دەکەین لەبۆ ئەم حکومدارییە وەک خۆی دەردەچێت، ئەوە دەبینین لە گۆڕەپانی زۆرانبازی کوردەکانی باشوور لەبەغدا بازاڕی گەرمە و مەیدانی بۆ ئامادە دەکرێت، ئێستاش نەچووە بچێ دەکرێ خودی( کاک مەسعود) وەک بەتەمەنترین سەرۆک حیزب و خاوەن ئەزمونی دوورو درێژی سیاسی و مێژوویی لەئێستا درک بەو دۆخە پڕ شێواو بێ سەرەوبەرەییە بکات و ڕەسمی سیاسەتی هەرێم دابەڕێژێتەوە و لەگەڵ هاوتا دێرینەکەی بۆ خاتری ئاسودەبوونی ڕووحی (مام جەلال) حەق وایە زۆرینە و کەمینەی حیزبەکەی لەنێوان لایەنە کوردییەکان دابەش بکات گرێی ئەم دەستە لەرزیوە پینەبووە نەخرێته دان و بۆيەكجار چەرخى کورد بە ویست و دڵی نەیارەکانمان نەگەڕێ، خۆ هەموومان دەبیین برا عەرەبەکانمان لەئێستادا خوێنی حسێن و ستەمی معاویەیان لەژێر عەباکانیان گرێداوە و چاوەڕێی زۆرانبازی كوردانن، ئەم فڕکان فرکانی گەمەی زۆرینە و کەمینەیە مەترسیدارە بۆ قەوارەیەک کە خەتی سوور نێوان دێگەڵەیەو لەدوای شەڕێکی خوێناوی داڕێژراوە، شێوازی حکومداری نەخرێتە ژێر زەڕەبینی دەوڵەتانی هەرێمایەتی، باڵا و پەین دەکات، ئەگەر نا زۆر ڕۆشنە کە ئەم گرێبەستە کۆمەڵایەتییە لەنێوان خەڵک و دەسەڵاتدا هیچ مانایەکی نەماوە، تێکدانی ئەو ڕیزبەندییە پێش هەر کەس و لایەنێک لوتکەی دەسەڵاتی هەرێم زیانمەندی گەورە دەبێت.

ئەم غەمەی کە ئێستا لێرەدا شەن و کەوی دەکەین، بابیرمان نەچێت بۆتە غەمی بەشێکی کەمی کۆمەڵگەی کوردی، ئەوەی زۆرینەی خەڵکە سیاسەت و تیڤی و ڕۆژنامە و ماڵپەڕەکانی خستۆتە پشتسەر و دەستی ئومێد و هیوای لێبەرداوە، بۆیان گرنگ نەماوە چ ڕەنگ و کێ سەرۆکە و دەخرێنە سەر نەخشەی چ جوگرافیایەک، بەقەولی ئێرانیەکان دەڵێن” تاخڕ خڕە تولجن غەرق هستیم”