سەردێر

ماراسۆن بۆ دەباشان

ژوان ئەحمەد

لەوەتەی بافڵ تاڵەبانی جوڵەكانی دەست پێكردوە و لاهور شێخ جەنگی كەنارگیر كردوە، ماراسۆنێكی عەجیب دەستی پێكردوە ڕوەو دەباشان، لەم ماراسۆنەدا چەندین جۆر پێشبڕكێ دەبینین:
– كادر هەیە دەستی توشی تەشەنوج بوە ئەوەندە وێنەی كاك لاهوری سڕیوەتەوە و بە شەرمەوە وێنەی مام جەلال دادەنێت
– ئەندامی سەركردایەتی هەیە، سەعات 3 ی شەو رۆیشتوە بۆ دەباشان بۆ ئەوەی كاك بافڵ ببینێت و بڵێ من لەگەڵ تۆم و ئەوەی پێشوو راست نەبوم كە كۆیلە و دەستەپاچەی بەردەمی كاك لاهور بوم.
– ئەندامی مەكتەبی سیاسی هەیە، سەعات دووی شەو نۆرەی بەركەوتوە تا بەیعەت بدات بە دڵسۆزی بۆ ماڵی مام جەلال و پەشیمانبونەوە لەوەی كە شوێن كاك لاهور كەوتوە.
پەند:
گرنگە هەردوو كاك ( بافڵ و لاهور) تێبگەن كۆنگرەی چوارەم چ كارەساتێك بوو بۆ ئەم حزبە، كارەساتێك كە هیچ لە شەڕی حزبە ڕكابەرەكان بە یەكێتی نەكردوە.
تێبگەن چ كادر و كەسانێكیان بردۆتە سەركردایەتی كە بایی پوشێك وەلائیان بۆ شكۆی خۆیان نیە ئیتر بۆ ئەوان چۆن ئەیانبێ.
گرنگە بافڵ تاڵەبانی درك بكات، ئەو كادر و سەركردانەی دێن بەیعەتی پێ دەكەن، چۆن لاهور و خۆیشیان فرۆشت، سبەی بە نرخێك زیاتر بافڵ و خۆیشیان دەفرۆشنەوە.
گرنگە بافڵ تاڵەبانی و قوباد تاڵەبانی تێبگەن:
خەڵك چاكسازی و رێكخستنەوەی ئیدارەی سلێمانی و زۆنی سەوزی دەوێت، دەیەوێ ژیان لەم ناوچەیە ئاسایی ببێتەوە، ئەگەر ئەوە بكەن ئەوا یەكێتیش دەبوژێتەوە، ئەگەرنا نەك لاهور شێخ جەنگی، بگرە تەواوی 124 سەركردایەتیەكە ( بەداخەوە ناویان سەركردایەتی یە و هەندێكیان تەنانەت هی مەیتەری و حاشیەش نین) لاببرێن هیچ گرنگ نیە، چونكە لە بنەرەتدا بەشێك لەو سەركردایەتی یە پەشم و پەڵەی گەورەیان هەیە و هی ئەوە نەبون بكرێن بە كادری ئاساییش، بەڵام روی تەكەتول و پارە و ساختەكاری رەش بێت ئەوان سەردەخات و كەسانی پاك وەلا دەخات.
چاوەروانین بزانین: بافڵ تاڵەبانی تەنیا خۆی دەكات بە ژمارە یەك، یاخود یەكێتی دەباتەوە سەر رێگەیەكی تەندروست و خۆیشی شانازی تۆمار دەكات ئەگەر پلە یەكیش نەبێت، بەڵام دەبێت سەرەتا ئەوە بزانێت، بەشدارانی ماراسۆنەكەی دەباشان، تەنیا گیرفانیان هەیە و لەمێژە مەبدەئیان گۆڕیوەتەوە بە مەبلەغ و سودیان بۆ خۆیان نەبێ بۆ كەسیان نیە.